【遊戲新聞】移植 HD 化工作由 DotEmu 負責《FF VIII Remastered》與原版不同逐個睇

 

早前 E3 2019 期間,同大家報導過「《FFVIII Remastered》高清版本今年全平台登錄」嘅消息。今次呢個 Remaster 版本,由法國遊戲工作室 DotEmu 負責。

如果近年有玩返各平台上舊作移植遊戲嘅朋友,相信都會聽過 DotEmu 嘅大名,呢間多媒體工作室近年經常幫各廠商做遊戲高清移植,例如《R-TYPE》以及《伊蘇》系列等,亦曾負責過《FFIV》以及《FFVII》嘅高清製作。

 

 

工作室本身都係《FF》系列嘅愛好者,今次《FFVIII Remastered》嘅工作都由佢地負責,佢地都深表榮幸;同時佢地亦補充,高清版裡面使用嘅音源將會係 PSX 形式,而唔會係以前 Steam 版本裡面質素較低嘅 Midi 格式。

 

作為 1999 年首度推出嘅經典作品,無論係 Square Enix 定係 DotEmu 都明白唔少舊玩家想單純地重溫故事,所以,同《FFVII》高清版一樣,呢隻《FFVIII Remastered》同樣地有新增無敵元素如下。

 

 

1)全遊戲可以三倍速度進行
2)戰鬥強化:角色 ATB 及 HP 常滿,並可隨時使出「爆發技」
3)Encounter Off:關閉即時遇敵功能,玩家可以直線衝劇情

Steam 版遊戲仲會有以下超屈機輔助設定:

1)全道具入手(劇情需要物品除外)
2)全能力技能入手
3)G.F. 等級全滿
4)Gil 全滿
5)魔法等級全滿
6)全卡片入手(特定卡片除外)

當然玩家可以將呢啲輔助設定自行關閉,要點樣嘅遊玩體驗,全由你控制。

 

 

至於畫質方面,無論無畫面呈現或者人物模組,都有做到美化修正,當然要與時下 3A 作品比較係無可能嘅事,但係作為畫面提昇黎講,以目前公佈截圖黎睇,我已經收貨。

 

 

《Final Fantasy VIII Remastered》將於 2019 年內發行,對應平台為 Steam、PS4、Xbox 以及 Switch。最後,我地黎聽多次「Eyes on me」,一齊黎重溫當年嘅感動:

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章