香港近月黎嘅示威活動頻繁，而「光復香港，時代革命」呢句口號亦都成為最具標誌性口號，而呢句口號除咗示威遊行成日聽到之外，亦有玩家將呢個口號喺各遊戲中表達。不過早前網上就有流傳一幅圖，圖入面顯示於《失落的龍絆》遊戲內將「光復香港，時代革命」呢句說話列為不當發言並刪除，我地就相關事件向官方 FB 專頁查詢，但於本文出街時並無作出回應。

「光復香港，時代革命」呢句說話成為今次運動最具標誌性口號

今日較早時段有網友於討論區貼出一幅遊戲截圖，內容係由任天堂及 Cygames 共同開發嘅遊戲《Dragalia Lost ～失落的龍絆～》，將「光復香港，時代革命」呢句說話列為不當發言並刪除。不過我哋編輯部同事試過喺《失落的龍絆》入面改名同喺公會頻講出以上口號都無事，期望官方會就此澄清。

網上流傳圖片，被遊戲列為不當發言並刪除

但根據我哋編輯部測試後，發現更改玩家名字做「光復香港 時代革命」，或者係公會頻度講出同樣字眼都無問題，暫時亦未收到官方回覆

我哋編輯部認為言論自由係香港嘅基石，此口號亦不包含粗口以及侮辱成份，如遭閉屏、刪除實屬政治審查，絕不能容忍。雖然《Dragalia Lost ～失落的龍絆～》仲未回覆我哋相關問題，但係為咗審視現時各遊戲情況，於是我哋編輯部決定試埋本身玩緊嘅各種手遊，結果喺晒下面，歡迎各位看倌試埋自己玩緊嘅遊戲再將結果話比我地聽，等我哋再 Update。

《Sdorica 萬象物語》發言順利，並無問題

《Dream Eater – 食夢計劃》發言順利，並無問題

《夢幻模擬戰》發言順利，並無問題

《Brawl Star 荒野亂鬥》發言順利，並無問題

《傳說對決》發言順利，並無問題（我又真係估你唔到）

《怪物彈珠》改名順利，並無問題

《刀劍神域SWORD ART ONLINE -記憶重組-》發言順利，並無問題

《非人學園》將「光復香港，時代革命」列為不文明發言

《第五人格》發言順利，並無問題（但此遊戲與《非人學園》同廠，非常奇怪）

《PUBGM》發言順利，並無問題

《足球小將翼夢幻隊伍》（日文版）發言順利，並無問題

《足球小將翼夢幻隊伍》（中文版）同樣發言順利，並無問題

《聖鬥士星矢 覺醒》發言順利，並無問題