早前同大家介紹過一隻以電影《死亡習作》作為藍本嘅恐怖遊戲《Blair Witch》，日前已經於 Steam 以及 XBox 平台上面推出。
呢隻第一身視點嘅遊戲，由曾開發《Layers of Fear》嘅 Bloober Team 負責製作，故事背景為 1996 年。退役警官 Ellis 發現左一盒錄影帶，發現與一班年輕人嘅失蹤有關，所以隻身去到馬利蘭州（State of Maryland）Burkittsville 嘅黑山森林（Black Hills Forest）搜索。
傳說呢個森林受到女巫咀咒，隻身進入森林嘅 Ellis，惡夢從此開始。
由於故事劇本吸引，唔少朋友都第一時間入手遊戲黎玩，不過玩家對於《Blair Witch》評價就頗為不一。對於亞洲玩家黎講，遊戲對應英文、日語以及簡體中文，而選用簡體中文進行遊戲嘅朋友，都發現字體殖入有亂碼問題，所以建議大家用返英文版進行遊戲（都好呀，唔駛大家睇簡體字）。
外國玩家就認為遊戲氣氛營造恐怖，然而 Bug 太多，例如主角經常卡於森林、卡於門縫，導致好多時候要 Load Save 再黎過，雖然官方馬上推出 patch 令問題稍為改善，不過都係建議大家定期存檔保平安。
最後係顯示卡問題。如果用 XBox 玩還好，Steam 版玩家要注意自己電腦規格，如果唔係 Drop Frame 問題都頗為明顯。
所以綜合各方評價，《Blair Witch》故事係吸引的，情節係驚嚇的，女妖係恐怖的，不過系統就未做到完美，未知各位玩家會唔會考慮入手呢隻遊戲呢？Steam 版即日起做緊九折優惠，售價為 HKD 116.1，優惠期到 9 月 7 日為止。
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。