【TGS 2019】估你唔到咁過癮 《一拳超人》對戰試玩超歡樂

唔知大家有無留意黎緊推出嘅《一拳超人》,本身睇片唔覺有乜特別,但估唔到實機試玩感覺又非常唔錯!今次試玩仲解開咗一直以黎嘅疑問,就係終極對決「琦玉 vs 琦玉」,結果又幾出人意表!

 

 

《一拳超人 無名英雄》係一隻三對三對戰遊戲,類似《Jump Force》咁玩。遊戲中最大特色就係當隊中其中一人係琦玉老師的話,該隊開戰時就會只有二人出戰,並且會有一個倒數時間,而呢個倒數時間其實係講緊琦玉老師趕到現場嘅時間,如果玩家戰鬥途中作出特定 Combo 又或者緊急閃避到對方攻擊的話就會縮短到場時間。

 

隊中有老師的話,開戰時就會有個到數時計

打出大 Combo 同緊急迴避會減少老師到場時間

 

當老師到場後,會先打出一拳同時進場。同原作設定一樣,所有角色都係一拳搞掂,講緊嘅唔係話用必殺技果種一招死,而係普攻就一拳死……,而且所有角色都無法對老師做成傷害。要避免呢個情況發生就只有喺老師到場前擊敗對手又或者…….同對手一齊揀老師用。

 

 

雖然上面話所有角色都無法對老師做成傷害,但有一個角色例外…..就係用返老師。但係無論攻防都係去到人類極致嘅老師面對自己時會點呢?其實答案好簡單,就係好似其他角色對決咁,變返正常攻擊力同防禦力,但因為老師招式太霸道,所以多數都係瘋狂出「連續普通拳」算 :p。

 

 

另外大部份角色都有得變換模式同出超必,例如老師可變身做「認真模式」,使出超必「認真拳」。但要注意唔係全角色都有得變身同出超必,好似無證騎士咁因為太廢就無得用……。

 

《一拳超人 無名英雄》發售日未定,對應平台為 PS4 / Xbox One / Steam。

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章