【TGS 2019】《SAO Alicization Lycoris 》試玩速報:完美還原動畫畫面 戰鬥打擊感有待加強

 

Bandai Namco Entertainment 於 9 月 11 日喺日本總部舉行咗《Pre-TGS Showcase》,首次比媒體一個機會先行試玩《SAO Alicization Lycoris 》。

作為第一次公開嘅試玩版本,如果本身係《SAO》Fans 嘅朋友應該會好滿足,因為遊戲於動畫還原嘅部份做得非常好,人物模組亦極為相似,而角色表現亦接近全語音,惟一美中不足嘅係,角色面部表情都係較為生硬,與《Jump Force》有同一個問題,就係角色講野嘅時候,好多時個口都唔郁,希望正式版可以有所改善。

 

 

《SAO Alicization Lycoris 》故事背景為動畫第三季去到第四季《Underworld》篇之前,係一個基於《Alicization》世界觀加以原創嘅新劇本,原創劇情佔左遊戲 50%以上;而較早之前公佈過嘅原創新女角色,將會與桐人、尤吉歐以及愛麗絲三人共同展開旅程。

 

TGS 會場內的試玩台

 

今次嘅試玩內容分為兩部份,分別為「地域探索」以及「頭目對戰」,基本操作唔難上手,每個角色都有既定戰鬥以及輔助技能,技能一旦使用後,要冷卻後先可以再用得;戰鬥可以中可以隨時切換場上角色去使用,確保玩家可以親身感受所有角色嘅攻擊技能。

「地域探索」地圖雖然大,不過會有引路方向帶玩家去任務位置。同以往嘅《SAO》遊戲相比,今集戰鬥動作爽快得多,不過注意今次呢隻《SAO Alicization Lycoris》係單機遊戲,並不支援聯機遊玩。

 

 

至於「頭目對戰」,操作大致上同地域模式時差唔多,不過打擊感就未算特別突出,按「R1+指令」嘅選用指令嘅玩法,好處係易上手,不過動作感就有待改善。

 

 

《SAO》推出過唔少代遊戲,重申,如果同以往舊作相比,今集整體操作、流暢度可以話係進步左;要知道好多玩家成功打爆一隻《SAO》遊戲,靠嘅絕對係意志力同埋對作品嘅愛,所以今集遊戲性明顯提高,加上《Alicization》「Underworld」呢一段劇情的確係精彩,相信 Fans 們應該都唔會猶豫,一定會入手呢隻遊戲了吧?畢竟,淨係睇過場動畫已經抵返!

以下為 TGS 2019 最新公開嘅兩條遊戲宣傳片段,極有《Eva》味,仲有 Asuna 登場,玩家們絕對要睇!

 

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章