PlayStation 於今晨舉行 State of Play，正式宣佈備受期待嘅遊戲《The Last Of Us Part II》已定於 2020 年 2 月 21 日全球同步上架，對應平台為 PS4。作為 2013 年大熱作品《The Last Of Us》嘅續作，Naughty Dog 嘅創作總監 Neil Druckmann 就表示，今次嘅《Part II》將會係佢地最有野心嘅作品，所以遊玩內容非常豐富，故事線亦好長。

今次遊戲容量為兩隻光碟，如果係入手數位版嘅朋友，目前遊戲嘅網上預約已逐步於 PS Store 上面開始，想到時準時有得玩《Part II》，記得預留時間事前 Downoad 定遊戲。

《Part II》係一個以「憎恨（Hate）」作為主題嘅故事。早前遊戲公開嘅短片入面，相信大家都記得 Dina 與主角 Ellie 似乎有百合情節，但係喺今次最新公開嘅片段入面，Ellie 與 Dina 騎馬出外時，出現疑似 Dina 遭敵人毒手嘅畫面，以及 Ellie 被毒打嘅場景。故事到底點樣發展？相信各位玩家都會好期待遊戲正式發售嘅日子。

另一個注目點係第一集主角 Joel 再度登場！作為 Ellie「爸爸」一樣嘅存在，今集佢再次出現，仲話「我唔會比你一個人作戰」！但係到底 Joel 呢段時間到底去左邊，呢個謎題，同樣留比玩家於遊戲中慢慢探索了。

其實黎到《Part II》嘅 Ellie 已經 19 歲了，故事一開始時佢只係喺 Jackson 鎮過住普通年輕人嘅生活，不過因為 Dina 嘅事，Ellie 為左報仇，再次踏上旅途。事隔多年，遊戲於動作系統上面亦都有更完善改進，手槍、弓、刀嘅利用，以及傷害真菌感染體以及敵人時嘅細部動畫都做得更細緻，Fans 們絕對值得期待。