香港人爭取自由之路已經持續超過四個月，而我相信一日未取得勝利大家都唔會放棄。呢個時候爭取國際間嘅支持，以及紀錄低整個運動所發生大大小小各種事件係非常重要嘅一環。於是獨立開發者 Polo 就決定用遊戲嘅方式，製作《The Revolution of Our Times》，去令整個文明世界嘅人都了解香港發生緊咩事，一齊去參與「時代革命」。
《The Revolution of Our Times I》係一隻文字型 RPG 遊戲，暫時只有 Android 平台，不過我哋同 Polo 傾過，佢話自學緊 iOS 編寫方法，遲少少會出埋 iOS 版本。至於點解會有個「I」字，係因為已經預備定會有「II」同「III」。至於內容 Polo 就話希望呢個系列係根據史實黎寫，雖然未有計劃「II」同「III」內容係乜，不過都會係基於某個運動嘅故事。
《The Revolution of Our Times I》由 6 月 7 日開始
講返遊戲本身，故事每個階段都要你作出選擇，例如做和理非齋行、上前線做衝衝子定返屋企瞓教等等，而每個選擇都會對往後故事發展產生影響。例如當你勇氣唔夠怕死走佬的話，你就自然無得上前線，咁自然睇唔到前線發生緊咩事啦，不過記住我哋走緊呢條路上所有人都係咁重要的。
唔夠勇氣值就無得揀上大陸選項（呢個時勢上去又真係要幾需要勇氣嘅）
除咗路線上嘅選擇，玩家係有攻擊力、防禦力等「能力值」，玩家可以透過買「香城 Online」嘅裝備去強化。要買野當然要「錢」，呢隻遊戲就用「Points」去代表。玩家最主要得到「Points」嘅方法就係解鎖成就，亦都可以選擇睇廣告又或者直接課金。（不過 Google 已將遊戲下架，所以作者並唔會得到任何收益，建議各位想支持嘅直接聯絡開發者）
玩家係有攻擊力、防禦力等「能力值」
可透過買裝黎提升能力值
要獲得「Points」可透過解成就得到
同現實一樣，大家都未知點先會贏，要贏就要靠大家努力。不過 Polo 就講咗三個會輸嘅情況，分別係主流聲音變晒做「藍」、死亡、同埋通過送中法案。同時亦都相信未來會有更多輸嘅情況，借遊戲去提醒大家面對緊嘅形勢，非常有心。
變晒做藍絲就輸
「Health」一欄跌到去0即係死亡，同樣會輸，大家請愛惜生命
玩家每個重要嘅選擇都會記錄喺 timeline 度，所以每個人每次玩都會有唔同嘅 timeline，創做屬於自己嘅歷史
《The Revolution of Our Times I》暫時只得 5 個章節，紀錄嘅事件只係去到六月尾，但係更新會參照時序線，再去搜集返當日仲有咩事情發生。同時遊戲八成嘅收入將會每個月尾捐俾星火（Google會拎原價30%），所以建議大家盡量用課金選項，支持開發者之餘亦都可以支持運動。（最新更新：Google 聲稱《The Revolution of Our Times I》題材敏感，所以已將遊戲即時下架 ）
《The Revolution of Our Times I》Android 版下載連結
不撤不退，我愛香港。