【遊戲感想】今個月眾多作品中嘅滄海遺珠《Concrete Genie》極為用心製作嘅寂寞歷險小品

 

SIE(Sony Interactive Entertainment)旗下嘅 Worldwide Studios 於 10 月 9 日推出左呢隻名為《Concrete Genie(台譯:壁中精靈》嘅歷險遊戲,不過一來香港而家烽煙四起,二來 9 月以黎大作如《Monster Hunter World: Iceborne》等作品密集推出,好似《Concrete Genie》呢類題材較為冷門嘅小品遊戲,或者好容易比大家忽視左。

玩家飾演性格有點宅嘅少年 Ash,父母經常工作在外,惟一興趣係畫畫。由於性格寡言陰沉,所以經常受到童黨欺凌,但係大家其實原本都居住喺同一城鎮(Denska);只不過 Denska 已經因為各種經濟以及污染問題而荒廢。

話雖如此,Ash 都仲係經常偷偷進入 Denska,一個人畫畫,一個人回憶呢個理應係自己屋企嘅地方,過去嘅美好

 

 

Denska 裡面嘅燈塔一直有「鬧鬼」傳聞,Ash 機緣巧合黎到燈塔,發現自己筆下所畫嘅「精靈」居然實體化。精靈仲同 Ash 講,你嘅畫裡面有生命力,只要你嘅畫充滿 Denska,呢個地方就能夠起死回生。

唔駛勇武,唔駛流血,淨係靠畫畫就可以救返一個家,呢個遊戲簡直係和理非嘅恩物(喂)

 

燈塔精靈 Luna

 

所以,簡單黎講,《Concrete Genie》共分四章,頭三章遊戲玩家需要一邊收集圖樣,一邊於城鎮裡面畫畫,去驅除黑暗;去到最終章就多左少少戰鬥元素。遊戲難度有分三級,但係其實去到故事後期有少量戰鬥成份時,先叫做有少少唔明顯嘅分別,畢竟呢個遊戲要帶比玩家嘅挑戰並唔係難度。

 

原本一片灰暗嘅死城

 

遊戲地圖唔算大,但係基本上有牆嘅地方,玩家就可以喺上面畫畫,想快嘅朋友可以淨係畫到滿足過關條件就算。但係,遊戲嘅美術效果做得極好,樹枝會自己開花,吊燈會自己發光,如果想轉換心情(或者你同我一樣有強逼症)將成個城鎮都染上色彩,到最後大遠鏡 zoom 埋去嘅畫面,得罪講句,的確係 Literally「畫面好靚」,係治癒的。

 

偶爾要滿足「精靈」嘅要求之外,基本上自由作畫

畫面好靚呀喂 orz

 

除左畫畫之外,精靈分為風、火、電三個屬性,地圖上有啲地方需要玩家思考解謎去降鎖道路。不過,當然啦,都係趣味為主,難度唔高,但係令到遊戲內容比較多元化就係真嘅。

 

例如點樣爬上高處

或者觸發電流

 

至於點解題目中話《Concrete Genie》係一隻寂寞嘅故事呢?

因為遊戲大部份時間,主角 Ash 都係無朋友,所謂精靈,其實即係你要自己畫啲朋友出黎同你玩……又,就算係蝦你嘅童黨,都係因為擁有各自嘅過去,先要蝦蝦霸霸去擦存在感。

 

畫精靈出黎然後一齊喺廢屋睇雪花電視,呢件事好 sad 呀喂……

 

《Concrete Genie》好適合三類人玩:情緒病患者,擁有寂寞童年嘅朋友,以及,相信黑暗過去總有光明嘅朋友。因為個故事畢竟係大團圓開心結果嘅,小朋友啲恩怨真係好兒戲(喂)

當然,現實中唔會有咁多 Happy Ending,但係遊戲中有正能量,假如你累了,《Concrete Genie》係幾有療癒作用的。

 

 

綜觀黎講,當初我抱住一試無妨嘅心態開 Game,結果一開始左,我就放低了攻略緊嘅《Code Vein》,花左少少時間去爆機。遊戲篇幅唔算長,以小品遊戲黎講份量適中,但係操作上嘅自由度、以及畫面美感嘅呈現,比好多時下作品都優勝。

當然,淨係鍾意玩 FPS 或者動作遊戲嘅朋友或者理解唔到佢嘅樂趣喺邊,但係如果你都鍾意玩靜態遊戲、或者想簡單輕鬆下嘅,《Concrete Genie》係一隻抵玩嘅唔錯選擇。

遊戲同時有對應 PSVR,有配件嘅朋友可以順便一試;無 VR 嘅朋友亦都唔需要擔心,對遊玩過程亦無不良影響。

《Concrete Genie》有繁體中文字幕,香港 PS Store 售價為 HKD 238。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章