【電競新聞】再有美國大學爐石隊伍因為撐香港被暴雪禁賽六個月!

 

無奈地,今日繼續地同大家分享來自暴雪嘅消息。自從聰哥事件之後,暴雪多年黎建立嘅品牌形象陷入危機,唔少網友都認為暴雪已經同紅色資本劃上等號,亦有網上言論認為暴雪係咪已經唔在乎自己公司嘅聲譽。

國際炎上,玩家杯葛,#BoycottBlizzard,內部員工示威抗議……之後,暴雪退還獎金予聰哥,將停賽刑期改為六個月。不過,抱薪救火,玩家唔受落之餘,仲令中國玩家嬲豬,認為暴雪點解要罰得咁輕,中國主權不容其他國家勢力說三道四。

正當大家都好奇緊暴雪會點樣救火嘅時候,原來,於 10 月 9 日嘅時候,仲有另一隊爐石隊伍,來自美國大學(American University)嘅隊伍「Casey Chambers」於比賽直播中舉起標語,上面寫住「Free Hong Kong Boycott Blizzard」,但係當時暴雪居然無阻止,亦無即時對 Casey Chambers 提出懲罰。

 

 

如果你以為暴雪因此而獲得正評就大錯特錯。

暴雪一直話聰哥事件係「唔關政治事」而係「違反條款」,所以 Casey Chambers 就於 Reddit 上面提出疑問,喂,上次聰哥咁做,暴雪罰得咁重,點解我地舉牌,你就唔罰我地呢?公平咩?公正咩?

 

 

結果,幾日之後,該隊伍被暴雪判定為「違反爐石賽事 7.1.B」條款,要罰停賽六個月。7.1.B 條款係乜?即係話選手於比賽上作出影響其他隊伍作賽、或者有侮辱性等等言行嘅約束法則。

唔罰 Casey Chambers ,暴雪比人鬧唔公正;到暴雪真係罰返 Casey Chambers,網友就話「即係你其實知唔知自己做緊乜?專業比賽嘅罰則係咁兒戲嘅咩?」

對於 Casey Chambers 黎講,而家嘅事情進展,或者真係「計劃通」,令到大家對於暴雪電競比賽嘅公平公正性,再度關注起來了。

 

Casey Chambers 停賽日子為 2019 年 10 月 8 日起到 2020 年 4 月 8 日。

 

相關文章:

【遊戲新聞】暴雪叫停美國 Switch 版《Overwatch》發售活動・驚有人再舉牌撐香港?
【遊戲新聞】暴雪員工持傘於公司門口罷工抗議!反霸權・撐香港!
【遊戲新聞】暴雪對香港選手聰哥嘅懲罰導致全球炎上!多謝暴雪 We Connect

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章