【遊戲新聞】暴雪叫停美國 Switch 版《Overwatch》發售活動・驚有人再舉牌撐香港?

 

全球杯葛暴雪(Blizzard)事件又有新進展,雖然暴雪於一片聲討下將對聰哥判決改為禁賽六個月以及將全數獎金歸還,又多次強調聰哥事件「唔關政治事」,不過,玩家眼睛到底還是雪亮的,對於暴雪而家想食兩家茶飯嘅做法依然唔收貨,所以杯葛聲音依然不斷。

 

 

暴雪旗下著名遊戲《Overwatch》早前宣佈將會移植到 Nintendo Switch 平台,並於上周發表將在美國紐約嘅任天堂官方直營店舉行事前發佈 Event,招待 150 位玩家到場試玩以及與美版遊戲聲優們見面。

不過,今日較早時份,亦都即係消息發表嘅剛好一星期後,美國任天堂宣佈「活動取消」,並指明係「暴雪官方自己落嘅決定」,但係取消原因就無提及。

 

 

活動取消消息一出,網上留言,出奇地無人話暴雪安排不當,反而仲有玩家話「你唔搞我地都無損失(And nothing of value was lost.)」,其他留言亦都係一面倒貼出《Overwatch》角色 Mei「Free Hong Kong」甚至支持台灣獨立嘅圖片,亦有大量外國網友喺下面索性討論起香港嘅示威狀況起來。

 

網上同人圖片

 

至於今次暴雪取消活動原因,大家都相信同近日美國唔少公開活動例如 NBA 及電競賽事上面,有國民舉「Free Hong Kong」標語有關,由於唔想活動再與「政治」有所牽連,烽頭火勢,唔知暴雪想重新洗牌再出發受到玩家歡迎,要到何年何月先可以做到呢?

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章