【遊戲評測】日系黑暗靈魂《Code Vein》 方向正確「大器將成」

由 Bandai Namco Entertainment 製作嘅《Code Vein》(噬血代碼),早於公布時就以「日系類魂遊戲」作賣點。理論上有日系人設+魂系玩法應該大受歡迎,雖然外國的確有唔少直播主玩同討論,但香港就好似比較少人留意,實際上遊戲雖然有唔少缺點,但其實亦有非常多嘅可取之處,作為《Dark Souls》Fans 嘅我就為大家講下呢隻遊戲各方面到底係點啦!

 

 

《Code Vein》有二大賣點:日系人設+魂系玩法。各角色人設極之美觀,捏人系統亦都做得非常用心,大量預設模組都做得好靚,只要稍作微調已經非常靚仔,唔需要逐個參數調整(當然你有心機嘅都有得細調),呢點係「類魂遊戲」係比較少見。人設外遊戲中嘅美術表現亦都唔錯,不過場景設計比起《Dark Souls》系列就明顯輸一截,呢點後面會再講下。

 

捏人選項都頗多,而且預設嘅模組都好靚下

捏到咁都得,睇下幾似樣

遊戲畫面表現符合大作水平,雖然 Drop Frame 偶有發生,表現不完美但可接受

 

《Code Vein》故事背景講述世界被一片「血霧」濃罩住,重生為吸血鬼嘅人們必需依靠人類血液或者「血淚晶」為生。由於血液及「血淚晶」供不應求,於是出現各種搶掠、獵殺行為,為咗中止呢種混沌及尋找真相,主角一行人決定踏上旅程。遊戲主線劇情、運鏡都做得頗為出色,不過最出色嘅反而係描寫各角色嘅支線劇情。

 

血霧令吸血鬼們被困於同一區域

整埋開場 OP 動畫,首歌仲要係 HYDE 唱,落足本

 

遊戲中嘅支線劇情以「記憶碎片」形式展開,玩家分別會喺各地圖、副本或完成任務後得到「記憶碎片」,之後可透過碎片得知角色嘅過去、經歷等等,配合優美嘅背景音樂,呈現出一個又一個獨特嘅故事,當中更有幾位角色互相交纏嘅過去往事,感覺就好似睇緊一本有聲有畫面嘅小說一樣,手法高明。對比《Dark Souls》以破碎嘅線索重組故事別有一番風味。

 

透過「記憶碎片」得知角色嘅過去歷史,當中又以八雲呢個角色做得出為立體

 

遊戲基本流程同《Dark Souls》相似,都係一幅大地圖再分為若干區域探索,最後就打該區嘅 Boss。但係並非每幅地圖都可以互通,整體結構略嫌簡單。而且部份地圖採用多層交錯道路設計,但沿路景觀大致相同,變相好容易迷路,呢點喺外國備受大量玩家批評。

 

白血教堂地圖迷路情況嚴重,行黎行去都係咁嘅款

火降街地圖算係較為有《Dark Souls》味

有類似《Dark Souls 2》城中大洞地形,都係搵啱個位跌落去

所謂嘅謎題形同虛設,門嘅開關就放喺門前,用意何在?(仲要有大量相同機關)

 

重點當然要講下《Code Vein》嘅戰鬥系統,不過正式講前要先理解遊戲基本概念。遊戲中會有各式各樣嘅「血碼」,可以理解為「職業」。有專門針對遠程攻擊、近戰特化、瞬間爆發、持久力、探索型等等「血碼」。「血碼」除咗會影響血量、攻擊力等基本數值外,亦有對應唔同嘅技能,當對應技能熟練度滿咗之後,即使轉換血碼仍然可以使用。換言之,遊戲中並無最強血碼,只有超豐富嘅技能配搭。

 

各種「血碼」對應唔同技能,好似我專精斧槍就要精通「增加斧槍攻擊力」呢個被動技能

圖中〞有缺陷」嘅技能需要修服對應嘅血英先可以學得,要修復血英就要搵到相關嘅碎片

圖中技能配搭將原攻擊力激增至四倍,玩「一拳超人」!

 

要使用技能就必需消費「鍊血」,要回補返「鍊血」就只有「背刺」、「反擊」、「吸血攻擊」或者使用道具等幾種方法,亦即係遊戲所標榜嘅「吸血」(開頭我以為吸血即係補血咁解),亦都係整隻遊戲嘅精髓。

唔同嘅「血碼」會有相應嘅「鍊血」上限,簡單講越係近戰特化嘅血碼,鍊血上限就越低,但呢個只限於重生又或者坐火後。不論使用「背刺」、「反擊」、「吸血攻擊」,只要成功的話就會增加鍊血上限,亦即係話就算用近戰特化型,只要盡力每隻怪都用上述手段就可以將鍊血增加至上限,打 Boss 時就會有更多資源應戰,一切都係睇閣下嘅技術!(但留意因為係類魂遊戲,失手被打中都會好傷下)

 

「反擊」成功會增加「鍊血」上限,留意右下角有 +2 字眼

 

另外值得一提嘅係玩家身上嘅防具叫做「吸血牙裝」,唔同類型嘅牙裝會令吸血攻擊產生變化,類似《東京喰種》 入面嘅赫子咁。而每種牙裝實際上都暗暗地分為「輕」、「中」、「重」裝,每件牙裝都有穿着需求,同時亦會針對不同屬性作出加乘。但係由於本作並無法自由加點,直接影響「血碼」+「吸血牙裝」嘅配搭,變成某部份牙裝只能夠配特定幾個血碼。

 

「反擊」成功會有特別畫面睇,好型!

呢件牙裝對應嘅好明顯係「尾赫」,好有《東京喰種》味

 

作為類魂遊戲,Boss 戰絕對係最重要嘅地方。《Code Vein》喺呢 Part 算係交足功課,每隻王都有獨特嘅攻擊方式,要完全無傷地贏並非咁簡單。可惜嘅係難度對比試玩版時明顯大幅降低,我要去到尾三 Boss 先唔係「初見殺」,要去到二週目玩 Hard Mode 後先比較接近《Bloodborne》難度,期望之後嘅更新容許玩家一開始就選擇 Hard Mode。(利申:《Dark Souls》27Lv 全破、《Dark Souls 3》40Lv 全破、《隻狼》敲鐘+苦難+不升攻擊力 「龍歸故土」Ending)

 

Boss 設計係型的

呢隻直頭可以出 Figure

尾王(?)的確有啲難度,我都死咗 6 次左右先贏到

遊戲中會執到「深層地圖」,即係副本,理論上難度應該比本章高,實際上……

《Code Vein》都有「王武」呢樣野,不過就變成同 NPC 培養好感度換返黎

 

總結:

遊戲缺點唔少,難度偏低、地圖設計欠缺深度、智障級謎題、敵人偏少、無自由配點、零難度可言副本等等,但其實都係非常容易修正嘅問題。反觀日系人設、強大聲優陣容、富心思血碼牙裝配搭系統、Boss 設計出色、多重結局等等優點其實可以彌補佢嘅不足。

以新 IP 黎講,整體算係做得唔錯,大方向絕對正確,我亦認為隻 Game 絕對係水平之上嘅作品,可以一戰!

 

《Code Vein》已經推出,對應平台為 PS4 / Xbox One / PC。

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章