【遊戲評測】久違驚喜滿滿運動會 《瑪利歐&索尼克 AT 2020東京奧運™》有趣抵玩與眾同樂好過癮

耐唔耐就會有一隻奧運會相關遊戲推出,老實講玩過唔少呢類遊戲都係伏味濃郁。不過早前推出嘅《瑪利歐&索尼克 AT 2020東京奧運™》經試玩後,發現意外地有趣,最估佢唔到嘅係隻 Game 有得玩埋 像素風嘅 1964 年東京奧運會,完全係買一送一,真正好玩夾抵食!

 

 

《瑪利歐&索尼克 AT 2020東京奧運™》分為故事模式同競技模式,後者最多可供四人遊玩。先簡單講講故事模式,Mario 同 Sonic 嘅二位魔王製造咗個遊戲機陷阱,成功令 Mario 同 Sonic 被困於《1964 年東京奧運會》遊戲內,但因為意外令自己都被困在內,於是大家就搵方法逃離陷阱。故事劇情雖然簡單,但係有花心思融入各種小遊戲,並非只用固有競技項目去 Hea 玩家,算幾有心。

 

故事模式一開始已經係像素風,幾過癮

 

故事模式偶然會預到「奧運小知識系列」,從中可以了解更多奧運相關歷史

會出現各種地標,而且 2020 奧運同 1964 奧運地標有所不同

2020 奧運,見證住年代變遷

將原作遊戲以小遊戲方式融入,有花心思並非求其 Loop 返堆競技項目 Hea 玩家,抵讚

 

主菜競技模式有 24 項比賽項目,當中唔少都非常講求技巧,唔係話齋督鬥快就算,加上大多數遊戲都有 1-2 種體感遊玩方式,相比起齋用 Joy-Con 又係另一種玩法。而最驚喜嘅地方係大部份遊戲質素都唔錯,特別係空手道、自由體操呢類講反應戰術嘅項目異常過癮,當中仲有唔少技術含量,所以編輯部試玩時經常充斥住「呢場唔算」、「你符碌咋再黎過」等等賴地硬言語,真係好鬼死歡樂,以下特別揀咗幾隻精選同大家介紹。

 

比賽項目算係幾豐富

編輯部派對項目推薦:「夢幻競速」 可用單手體感模式或按鍵模式 類似踩板版本嘅 Mario Kart,都係鬥快,路上有 Item 執,著重技巧及判斷力。

編輯部派對項目推薦:「運動攀登」 可用雙手體感模式或按鍵模式 限時內爬得最高者勝,每一步都要考慮行走路線,再諗用左手定右手爬,當手型符號中圓點與石上圓點重疊就會扣極少體力,體力用晒就會跌落街,著重判斷力。

編輯部派對項目推薦:「空手道」 只有按鍵模式 雙方對打,先得十點者勝。有基本拳腳攻擊、儲力攻擊、必殺技、投技等攻擊方式,每種方式嘅攻擊距離、性能皆有分別,掌握遊戲玩法之後雙方攻防會變得好好玩,著重策略、空間感、技巧及判斷力。

編輯部派對項目推薦:「4 x 100 公尺接力賽」 可用雙手、單手體感模式或按鍵模式 傳統狂撳類競速,但交棒時要考驗準確性,團體對戰時會更歡樂,著重手速及判斷力。

編輯部派對項目推薦:「自由體操」 可用單手體感模式或按鍵模式 助跑時要狂撳,但做動作時要跟返指令,而且指令完全隨機,頗有難度,完成所有動作後高分者勝。著重判斷力及準確性。

編輯部派對項目推薦:「足球」 只有按鍵模式 四人足球,玩法都係傳波射波,但都有小組進攻、底線傳中等技巧。節奏明快適合多人遊玩,著重策略及技巧。

 

眼利嘅讀者相信會留意到右邊寫住《1964 年東京奧運會》,其實撳落去就會切換到濃厚紅白機味道嘅像素風 1964 年版本奧運比賽項目。呢個版本嘅比賽項目操作相對地簡單,項目亦都比較少,但係都不乏如「跳馬」、「跳水」呢類好玩嘅項目。值得留意嘅係呢個版本嘅背景音效都會轉為舊版 8-Bit 音樂,誠意十足。

 

1964 年版本「跳馬」,起跳後要撳晒呢對指令,起跳最高點到落地間大約有 3秒時間左右,都有難度的

雖然 Mario 同 Sonic 都係用初代角色,但由於 Sonic 初次登場已經係 16-Bit 機種,所以角色線條比起 Mario 明顯更細緻

呢啲細節位幾有趣

 

總結:

《瑪利歐&索尼克 AT 2020東京奧運™》以 Party Game 黎講做到最基本同時最重要嘅野,就係一班人玩會開開心心,而且畫面表現唔錯,格數亦足,整體流暢度令人滿意。本作大部份項目都非常易入手,就算無打開機嘅都唔會話一面倒輸,所以一班人玩時會觀眾都會覺得好睇、好笑,特別係攀石項目會睇到群情洶湧,如果再玩埋包尾果個要食納豆的話更見刺激。

近年要搵一隻唔伏嘅奧運會遊戲真係唔容易,如果想買隻合家歡遊戲看門口,又想食住明年奧運熱潮的話,誠意推薦《瑪利歐&索尼克 AT 2020東京奧運™》。

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章