MEZCO ONE:12 COLLECTIVE 呢個系列嘅原創角色向來都係以佢地公司 LOGO 隻 Gomez 去做主題，但蟲蟻類產品就唔係人人受得，咁就冇同大家介紹。而終於 MEZCO 開創左另一個全新原創角色系列 One:12 Collective Rumble Society，第一彈 Pink Skulls Chaos Club 以三個粉紅骷髏人登場。
睇落好似冇咩特別呢？其實所有都喺細節當中，而且仲啱晒依家時局。外國嘅玩家D Amazing率先喺 MEZCO Toyz 手上拎左呢套全新產品做評測，發現唔單只宣傳 LOGO、包裝同三隻骷髏外套上大大隻字寫住「自由死亡」，而且配件仲有士巴拿、汽油彈、手扣、鎖鍊、棒球棍等等，仲有圍巾比大家幫佢地「蒙面」。
香港相信好多玩家必定想入手，預訂將會喺今晚凌晨兩點開始，要訂嘅朋友就記得去下面傳送門 Mark定啦！
不過有個小插曲就發生喺北方強國，好多玩家向來都幾 Buy MEZCO Toyz 品牌嘅 1/12 產品，但見到呢套 Pink Skulls Chaos Club 之後轉晒軚，喺微博大鬧 MEZCO Toyz 係港獨玩具廠，並話 MEZCO Toyz 嘅吉祥物 Gomez 係曱甴。其實佢地又錯唔晒嘅，MEZCO Toyz 早年未有 Gomez 呢個角色之前，真係用隻曱甴做吉祥物，代表喺紐約生存需要強大生命力。直到 2008 年先定義 Gomez 呢個角色同背景資料，佢只係一個昆蟲頭人身嘅星際特工，所以 Gomez 嘅產品有時都唔只係一款昆蟲頭架！
講返 Pink Skulls Chaos Club，將會喺今年 12 月發貨。到時強國會唔罷買，定係如 iPhone 一樣用住嚟鬧，我諗大家好快會知道。
ONE:12 COLLECTIVE Rumble Society – Pink Skulls Chaos Club 官網傳送門
阿九
打機 - 識少少；玩具 - 識少少；睇戲 - 識少少；動漫 - 識少少.....
買膠、派膠、分享膠！Only The Best Is Good Enough！
Lego Enthusiast //goo.gl/HRnxDW