【遊戲新聞】得獎恐怖冒險遊戲 《孤女咒怨》幫人幫到惹禍上身

唔知大家有無試過,家中嘅老人家告誡千其唔好喺條街度執啲來歷不明物品返屋企,特別係雨傘、公仔呢類野,因為好容易有邪靈附喺上面,帶返屋企就等同帶厄運返去一樣。但如果係活生生嘅細路女走過黎叫你帶佢走,你又會唔會幫佢呢?恐怖冒險遊戲《孤女咒怨》(Loco Parentis)就係一個因為幫細路女結果連自己都遭受到一連串怪事嘅故事…….

 

 

《孤女咒怨》(Loco Parentis)由獨立遊戲工作室 Fair Games Studio 開發,採用第一身視點。故事講述你同平時一樣,出門散步時,見到有位驚惶未定嘅細路女,然後佢請求你幫佢搵返媽媽。而喺幫佢搵媽媽嘅途中,細路女突然比人捉走咗,同時身邊開始發生一連串怪事,並發現自己已經被困於呢棟建築物中。

 

本作曾鑊獎及多次於各項比賽中名列前茅

 

遊戲中玩家會遇到大量詭異嘅事情、令人不寒而慄嘅鄰居等等,另外恐怖遊戲最重要當然係整題氣氛營造以及壓迫感,《孤女咒怨》喺呢方面做得唔錯,有種「透不過氣」嘅感覺。遊戲入面亦提供大量有挑戰性嘅謎題供大家破解,最正嘅係支援雙人合作模式,驚自己唔敢玩 / 玩唔掂的話都可以搵個人陪!

 

 

《孤女咒怨》(Loco Parentis)已於 9 月 20 日上市,暫時只有 PC Steam 版本,支援 VR。最近更新仲加入埋繁體中文字幕,入手係時候了!

 

五木

五木 動漫電玩宅,極愛金田一系列,擅長動作及策略遊戲

追蹤

更多文章