【遊戲新聞】用林克玩 Mario! 《Super Mario Maker 2》免費更新第二彈有大師之劍

有無諗過《薩爾達傳說》系列主角「林克」(無轉過一直都係佢做主角)如果喺 Mario 嘅世界入面會係點?唔係惡搞唔係 Mod,而係《Super Mario Maker 2》黎緊即將有第二彈免費更新,當中最令人注目嘅就係有得用林克玩!

 

 

 

《Super Mario Maker》系列係堪稱有最高耐玩性嘅 Mario 遊戲,玩家可自行製作遊戲關卡又或者下載其他玩家所製作嘅關卡,當然亦有官方所設計嘅關卡供玩家遊玩。今次第二彈免費更新將新增強化道具「大師之劍」,獲得後 Mario 將變身為林克。而且並非只有外觀改變,連攻擊方式都會變成同林克一樣。可以用劍斬人、舉盾防禦、衝刺、向下突刺等動作完全保留,而且仲可以同原作一樣用「炸彈」炸開道路、用弓箭攻擊遠處目標等等,非常過癮!

 

用盾擋!

無路行咪用炸彈炸開佢

因應林克特性製作專用解謎關卡

 

另外本次更新追加幾款新敵人及機關,話就話係「新」,但大家都係見慣見熟架啦。同時仲有個新嘅競賽模式「哈庫計時賽」(ハックンタイムアタック) ,類似賽車遊戲中嘅「鬼車」系統,計時賽模式中世界各地嘅紀錄保持者將化身為「哈庫」同玩家一齊闖關。而過關後會得到印章,收集夠一定數量將可獲得相應嘅 Mii 服裝,另外只要喺一定時間內通關就會得到用於 Mii 上的 Show Off 用星星。

 

競賽模式「哈庫計時賽」

完成關卡收集印章換 Mii 衫

 

《Super Mario Maker 2》已經推出,第二彈大型免費更新將於 12 月 5 日推。

 

 

滅盡殺手

滅盡殺手 重度魔物獵人中毒者,歷代遊玩時間破億分鐘!

追蹤

更多文章