【遊戲新聞】超宏觀開放世界求生遊戲《Little Devil Inside》有氣候變化仲有怪物要打

 

《Little Devil Inside》由韓國獨立工作室 Neostream 開發,遊戲於 2015 年於 Kickstarter 上面集資獲得開發資金,於 2017 年時曾經公佈首次測試遊戲片段。過去兩年入面,《Little Devil Inside》嘅團隊埋首改善遊戲當中,直至 2019 年 12 月 1 日,佢地終於又有新嘅遊戲片段公開。

玩家於《Little Devil Inside》入面飾演跟隨一位博士去探險嘅冒險者,雖然遊戲畫風為繪本風格,但係唔好比佢呃到,因為遊戲相當有難度!作為一個冒險者,點樣於旅途裡面滿足哂「衣食住行」,仲要面對猛獸以及「不思議敵人」嘅襲擊,玩法非常多元化。

 

 

遊戲地圖極為廣闊,沙漠、雪國、原野、海上等等場景都係玩家需要刻服嘅關卡,而剛剛公佈嘅極地雪國片段入面,可以見到更加詳細嘅求生玩法,例如係將雪球溶成水止渴、以及打獵過後將動物解體獲得肉與毛皮等。

因為玩家於遊戲當中,需要維持基本人體所需,例如係空腹度、口渴度、睡意、體力、生命值等各方面要素,所以唔係一味靠衝劇情就得,係一隻非常真實而耐玩嘅遊戲。

 

 

遊戲做得非常仔細,例如你嘅背包唔係無限容量,亦唔係好似平時其他 RPG 遊戲咁樣用一格格黎區分;《Little Devil Inside》嘅背包容量係直接咁樣展示比你睇:

 

 

不過幾時玩到遊戲就仲係一個謎了!團隊目前約有 30 人左右開發遊戲,但係因為遊戲內容比預期中更豐富,所以目前都仲未見到終點;而團隊對於遊戲係有野心的,目標係可以做到全平台登錄,包括家用機以及 PC。

順帶一提,《Little Devil Inside》於 2015 年放上 Steam Community 時已經獲得不少關注,不過 Epic Store 就表示有興趣將遊戲簽約做獨佔作品,《Little Devil Inside》團隊就話雖然都係以 Steam 作為佢地首選,不過目前仲未決定要擺喺邊個 PC 平台咁話。

我地就對呢隻遊戲非常有興趣,希望可以快啲玩得到!

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章