【遊戲新聞】《閃之軌跡 III》將會登錄 Switch 平台歐美版優先・亞洲版有待公佈

 

於 2017 年於 PS4 平台上發售嘅 Falcom 旗下王牌作品《閃之軌跡》第三集《閃之軌跡 III》於 12 月 4 日宣佈將會登錄 Switch 平台,並率先於歐美地區以全英文語音及界面版本發售,上架日預計為 2020 年春季;至於亞洲地區版本發售日就有待公佈。

 

 

《軌跡》系列與《伊蘇》系列為日本 Falcom 會社兩大 IP,於 JRPG 界別擁有大量忠實 Fans。《閃 3》故事發生於貴族派與革新派嘅內戰之後,男主角「灰色騎士」黎因從士官學校畢業,並成為士官學校分校教官,率領新生 VII 組學生開始冒險。

對於玩開《軌跡》嘅朋友黎講,《閃 3》可以見埋前作角色登場,作為承上啟下嘅作用,劇情安排做得貼心;對於未接觸過《閃軌》嘅朋友黎講,一開坑就玩《閃 3》或者於劇情上會應接不來,建立先由《閃 1》玩起,或者偷懶上網睇左前兩集劇情先。

 

 

《閃 3》沿用系列獨創嘅「AT 制式」進行半回合式戰鬥,今集新增「BP 系統」(類似角色特別技能),可以用每場最多五個 BP 點數去進行戰術支援,例如係三回合不受傷害、五回合加 ATK 等等。

 

 

《閃 3》落 Switch 後支援 TV Mode,不過畫質就只有 720p 對應 30 fps,所以相信以手提模式玩畫面會更為順心。至於 PS4 版本推出嘅 DLC 將會一拼收錄到呢個 Switch 完全版入面,有興趣入手嘅玩家務必多加注意。

以下為 Switch 英文版本宣傳片:

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章