2003 年時於 NDS 上面推出嘅 ARPG《Final Fantasy Chronicles》，於 2019 年 E3 時宣佈將會推出重製版本《Final Fantasy Crystal Chronicles》；遊戲原定 2020 年 1 月 23 日推出，不過遊戲製作人荒木竜馬於早前表示，為左確保聯機 Match Play 要素可以完善運行，加上遊戲裡面仲有 Bug 未處理完成，所以將會將發售日延至 2020 年夏天，準確發售日有待公佈。

《FFCC》遊戲係《Final Fantasy》系列嘅完全獨立外傳，講述世界遭受「沼氣」侵襲，所以主角同伙伴離開村莊，踏上旅途，希望搵到解決嘅辦法。遊戲特點係有聯機要素，而今次嘅《FFCC》嘅登錄平台為 Switch、PS4、iOS 以及 Android，而呢四個平台嘅玩家係可以聯機遊玩的。

今次嘅重製版，除左提昇畫質，亦最多支援四人聯機；同時會新增角色技能變化、以及爆機後可以挑戰新地城以及最難 Boss 等元素。

正如頭先提到，要做到跨平台（仲要係手機同家用機）嘅聯機，的確唔容易，所以延期亦無可厚非；不過日本網友亦有提出，較早前《Kingdom Hearts III》嘅付費 DLC「Re Mind」宣佈於 2020 年 1 月 23 日推出，即《FFCC》原定推出日，所以今次延期可能只係唔想影響彼此銷售，大家又點睇呢？