【玩物評測】暴徒?你話乜咪乜囉!《Pink Skulls Chaos Club》 開箱

11 月尾介紹過嘅 MEZCO ONE:12 COLLECTIVE Rumble Society – Pink Skulls Chaos Club 極速收到貨啦!唔講太多住,即刻同大家開箱慢慢睇!

內藏三隻紅粉骷髏,估唔到個運輸箱我一隻手拎得晒

MEZCO ONE:12 COLLECTIVE 嘅限定包裝總有啲新意,上次 Gomez – Stealth Ops Edition 就以女士手飾箱設計,今次就用餅乾罐

當然仲有 MEZCO EXCLUSIVE 嘅貼紙啦

而仲有條封條寫住呢個系列嘅名「RUMBLE SOCIRTY」,唔知下一隻同系列作品會唔會再有呢條封條呢?

個罐蓋仲印有突起嘅骷髏圖案

終於開封!呢個收藏方式好似幾慳位喎!

抽出罐內中間部份,就係呢度所見嘅三套 12 款手形,右邊配件組包括黃、綠、藍三隻色嘅手錶三把刀仔三個側孭袋三條鎖鏈三件外套三條圍巾。仲有三個配件收納袋同埋一張造型貼紙

罐內外圍就係三隻 Pink Skulls 同支架右邊同樣係配件組,而最底就放左三塊印有「P.S.C.C. 自由死亡」LOGO 嘅底板

第二份配件組就有三把武士刀同刀鞘三支印有「SKULLCRUSHER」字樣嘅棒球棍點著同未點燃嘅汽油彈各一兩支士巴拿以及兩個手扣

每個主體仲有一款頭雕同埋一頂復古電單車帽

有三隻 Pink Skulls 就梗係擺晒出嚟比大家睇清楚前後左右啦!不過咁樣睇就已經見到三個骷髏頭人手上色嘅差異

官方宣傳圖嘅呢組頭雕同全粉色頭雕相比之下更細致

仲有三頂復古電單車帽,特登做啲舊化落去令佢更有古著味道

睇返主體,件衫冇特登車死喺身上,令到玩家可以多啲造型配搭

硬係要搵啲野嚟「挑骨頭」的話,我會講件衫車工可以好啲,但平心而論呢類線衫做到咁細件嘅話,呢個手工係非常收貨

條牛仔褲都冇乜挑剔啦

頭先講過件上身衫係除得,除左之後就會見得到褲上仲有條皮帶!不過唔好諗住拆得,今次真係車實左喺褲上面

對鞋嘅內側同鞋底亦印有 MEZCO 嘅 「M」字 LOGO

未拎配件出嚟已經可以做到三個不同造型嘅 Pink Skulls

三個側孭袋唔只可以打開,仲可以輕微調較孭帶嘅長度

三件拉鍊外套睇就最好睇,但拎上手玩就最頭痛,事關一開頭已經拉好晒拉鍊,要著上 Pink Skulls 身上又要除又要扣,個拉鍊扣又得鼻屎咁大粒,真係粗暴少少我都驚整爛

淨係拉返條拉鍊,我足足搞左5分鐘….。・゚・(つд`゚)・゚・

著左上身係型好多嘅

仲有三隻錶,原來上面印有三個不同時間,藍色係01:00、綠色係02:00、黃色係03:00。特別一提所有手形並唔係黑色手,而係戴住黑手套嘅手形,所以就算比其他 MEZCO ONE:12 COLLECTIVE Figure 使用都唔會有太大衝突

第一份配件組加埋主體已經有住咁多嘅變化

睇埋第二份配件組,同時試埋 Pink Skulls 嘅活動性。拎棒球棍呢啲動作簡單啦

12 款手形,擺咩 Pose 拎咩武器或者配件都非常出色

呢排係咪咩 Figure 都要識擺呢個 Pose?雷之呼吸

二刀流

三刀流!!

 

 

 

 

 

 

對唔住,冇口咬唔到刀…….すみません

笑我?冇三刀流我仲有士巴拿同埋秘術!

魔法樽!

火魔法


總結

先講價錢的確相對平時產品嚟計,Rumble Society – Pink Skulls Chaos Club 就梗係貴好多,但見到大量嘅配件以及咁多變嘅造型,如果以官方定價再除返三隻,咁就只係 USD $75(約港幣 $585)一隻,不過依家先入手嘅話就當然冇可能做得到。雖然頭先用三隻 Pink Skulls 搞下笑,但講返設計上係以七、八十年代嘅 Punk(龐克文化)去做主導,帶出 Rumble Society 呢個系列嘅叛逆不羈玩世不恭創造自己法則嘅觀念。貼紙入面大家都見到其中一張係印住「NO FUTURE」,就係向英國 Punk Rock Band Sex Pistols 七十年代嘅單曲《God Save the Queen》致敬。加上骷髏於大眾口味上點都易接受過昆蟲頭,咁當然你話唔鍾意粉紅色就另計啦!而大量配件、手形等等,已經可以話係絕對超值。

正如 Frank Miller 喺啱啱過去嘅巴西 Comic Con Experience (CCXP) 上,對之前Dark Knight Returns: The Golden Child》封面事件所講「There are political entities out there so afraid of expression that they’re afraid of a picture. …They’re going to collapse anyway.(世上某些政治實體是如此害怕表達,所以他們才會如此害怕一張圖片…反正他們遲早也會崩解的。)」香港代理最終因兩個汽油彈嘅組件放棄呢批貨,而大陸就更加因為咁話罷買杯葛 MEZCO Toyz,Rumble Society – Pink Skulls Chaos Club 本來喺 Gomez 故事入面係啲搞搞震嘅奸角流氓,甚至你當佢係暴徒咁又點?如果因為一個汽油彈配件就作出有咁大反應,崩解嘅只係你嘅玻璃心,反正玩家一定要買要玩嘅大把途徑選擇!

最後一提仲想買 Pink Skulls Chaos Club 嘅朋友,MEZCO Toyz 官網係仲未售罄,仲可以比買家入 Wishlist 搏一搏,要追嘅就自己去佢地官網睇下好唔好彩啦!

ONE:12 COLLECTIVE Rumble Society – Pink Skulls Chaos Club 官網傳送門

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enought! Lego Enthusiast https://goo.gl/HRnxDW

追蹤

更多文章