【遊戲新聞】二足步行貓、魔法松鼠齊參戰 《動物之鬪》幻之動物格鬥遊戲

之前咪有堆「幻獸」爆紅,講緊嘅係「二足步行貓」、「魔法松鼠」、「猩猩烏鴉」、「右勾拳柴犬」呢堆人氣動物,有無諗過如果將佢哋變做格鬥遊戲會點呢?曾經製作《眾神之鬥》(Fight of Gods)嘅 Digital Crafter 再度發揮創意,即將推出幻獸大戰《動物之鬪》(Fight of Animals)!

 

 

《動物之鬪》(Fight of Animals)係以近年用「錯位拍攝」爆紅幻獸進行一對一嘅格鬥遊戲,支援線上對戰。呢堆搞笑幻獸暫時公佈咗有「二足步行貓」、「肌肉狐狸」、「猩猩烏鴉」、「右勾拳柴犬」、「魔法松鼠」同埋「肌肉白鯨」,每位都獨當一面,下面分享對比圖片。

 

仲有其他潛力角色,好似旋風飛行犬、操水之虎、土魔法松鼠之類,唔知之後會唔會出埋

 

遊戲系統非常簡單,都係得輕、重、特殊鍵三粒制,同時亦有專為新手而設嘅簡易操作,簡單按鍵就可以使出 Combo 連技。另外本作亦都有超必殺技,只要於戰鬥過程中攻擊、被攻擊就會累積超必能量,儲滿時按特殊鍵即可,非常簡單。而能量亦可以用於防禦,使出方法係被攻擊或防禦時按特殊鍵,就會爆開對手,有利重組攻勢。

 

 

《動物之鬪》(Fight of Animals)預計將於 2019 年 12 月 19 日發售,暫時只對應 PC Steam 平台,但考慮到同廠《眾神之鬥》經驗,相信之後都會有 Nintendo Switch 版本,敬請期待。

五木

五木 動漫電玩宅,極愛金田一系列,擅長動作及策略遊戲

追蹤

更多文章