＊本文所介紹的為一款 18 禁遊戲，遊戲內容有情色、暴力、精神恐怖及食人等敏感題材，或會令你感到不安；年齡不夠的乖寶寶請自行離開，不能接受獵奇創作的朋友也請自行注意！

請相信有玩開文字型攻略遊戲嘅朋友，或者同我一樣有番咁上下宅齡嘅朋友，都一定會知道《沙耶之歌（沙耶の唄）》呢個作品。由日本著名 AVG 工作室 nitro+ 開發，並於 2003 年 12 月 26 日推出嘅呢個遊戲，黎到今日，原來而家迎來第 16 個年頭了。

《沙耶之歌》係一個成人向 AVG 遊戲，但係情色鏡頭絕對唔係遊戲重點，《沙耶之歌》嘅劇本，由 Nitro+ 董事兼著名作家虛淵玄老師撰寫，故事暗黑而獵奇。

《沙耶之歌》故事講述男主角郁紀與父母遇上車禍，自己雖然存活，但係大腦經過實驗性質改造，從此，佢眼中所見嘅人與物，全部變成扭曲嘅血污同肉塊，食物變得噁心，連自己從前嘅朋友，都變成醜陋嘅存在，生活猶如地獄一樣。

而呢個時候，病床上的郁紀，於醫院裡偶遇少女沙耶，居然是以人類姿態出現，極為美麗。作為世界上面惟一見到美麗嘅事物，郁紀決心只為沙耶而活。

但係，沙耶喺其他人類眼中，正正係郁紀平時所見到嘅醜陋肉塊，然而，無論係想幫助郁紀嘅人，抑或係想了解發生乜野事嘅人，全部都無一倖免，陷入了不能回頭的惡夢裡面。

因為在座或者有未玩過遊戲嘅朋友，如果你對《沙耶之歌》感到興趣，遊戲於 2019 年 8 月 13 日時高清移植到 Steam 平台，對應英日語（仲有簡體中文…）。不過，重申，遊戲重點，並唔係情色方面，而係扭曲嘅愛情，以及對於「觀點與角度」不同嘅各種探討。

不可不提的是，《沙耶之歌》其實係以克蘇魯神話作為意念大綱的，沙耶的真正身份，一致被玩家認為係等同克蘇魯中嘅「母神」。

另外一樣不可不提的是，《沙耶之歌》嘅男主角聲優，標記雖然為「冰河流」，不過對聲優界有所認識嘅朋友，可能都會知道呢個名其實係「綠川光」當年於裡界活躍年代時用嘅化名之一；綠川光於裡界（無論係成人向定係 BL 向）都有不少作品，Nitro+ 都係佢合作單位之一，另一作品例如 BL 遊戲《咎狗之血》。

《沙耶之歌》可以話係我認識克蘇魯題材作品嘅根源，而呢個作品事隔十六年後回想，我依然認為係非常出色嘅 AVG 作品。最後送上《沙耶之歌》同名主題曲，由いとうかなこ主唱嘅「沙耶の唄」：