【讀者投稿】末日近了,你們應歸信小島《Death Stranding》玩家團結方可創造未來

 

文長,涉及劇透,總結在最尾,想睇評分可直接跳到最後。

2019 年對遊戲界來講,絕對唔算係值得紀念既一年。除左幾隻亮眼既 Indie 之外(都仲要少過舊年添)幾乎所有大作都只能評為中庸以上,能夠留下深刻記憶既作品非常少。

好在係呢個佳作沙漠當中,年尾我地仲有小島神獻上少少既希望,雖然都唔係話曠古爍今,都至少係一時佳話。

可惜既係,《Death Stranding》既遊戲評價非常兩極。當然遊戲有好多部份既缺憾仍然非常明顯,同時最大既負評應該係來自於小島之名,似乎冇想像中來得咁有用。

大家好似一直期待緊冇哂過往既品牌,資源以及既有企業框架既小島可以白手寫出絕世神作…….大佬呀,唔好咁痴線啦!《Death Stranding》其實只係一隻有AAA Budget 既 Indie 遊戲。如果你咁樣睇既話,其實佢點都唔算差。

 

 

係廣闊既世界入面享受孤獨

有好多人話《Death Stranding》其實只係行路/送貨模擬器,你只係不停咁將貨由一個地方送去另一個地方,途中仲要好少機會有野發生,根本就係遊戲界最討厭既 Fetch Quest 模擬器(所謂 Fetch  Quest 即係大老遠咁叫玩家只係去攞一樣野,後來被 MMORPG 廣泛採用,自此之後要玩家特登行去攞/搵一樣野,救一個人,殺一個/一堆怪,都係叫 Fetch Quest。而《Death Stranding》就全部都係去好遠攞野同殺人……….)

但實際上,又有邊隻 Game 係真係脫離到 Fetch Quest 既輪迴?就算係響負盛名既《The Witcher》《Skyrim》《Zelda》《Red Dead Redemption》,佢地既任務目標,又有邊次唔係攞野殺人同救人?最多加個解謎囉,又有咩分別?而且呢度隻隻開放世界遊戲,又有邊隻唔係要你攀山涉水行到死,最後只係為左完成好卑微既一個目標?

 

 

再退一萬步講,其實《Skyrim》係好多人眼中都係垃圾,因為個地圖太細,行得唔夠多!《The Elder Scrolls: Morrowind》同埋《Oblivion》其實個地圖係比《Skyrim》更大,而且因為當年既機能問題,地圖上面有既野係更稀疏,但當年好多人入坑既主要原因,就係可能係廣大既世界入面,真正幻想自己係一個孤獨既旅者,前往探索未知既世界。

唔好話比個任務佢地,好多人根本唔需要任務,佢地只係想行。

時至今日,仍然有好多人咁做,例如《Elite Dangerous》呢一隻 MMORPG 咁,就有成個銀河系比玩家一直咁飛,而的確係有好多玩家挑戰一個人飛到去從來未有人踏足過既空境,以此為目標同自豪。

有好多遊戲本身設計就係特色既賣點,因為你個人唔識欣賞,就話人地個設計有問題,咁可能只係你有問題啫。

 

 

享受共同建築既樂趣

自從《Minecraft》出現左之後,遊戲世界入面無論 Online 定 Offline 都多左一大堆類似既收集、建築、生存類遊戲,各有市場。

單機既建築生存遊戲就好講玩家到底鍾唔鍾意起野,當然我都明白好多人都係隱藏建築師,而呢類既遊戲亦都有好大既市場,但我個人其實非常討厭係隻 Game 入面起野。一來係麻煩,既要收集又要建築一腳踢,竟然就只係為左我可以過關向前行。如果好似《Fallout 4》咁可有可無都還好,但如果係建築主題既遊戲就真係嚇怕我在內既唔少玩家。

 

 

多人連線例如傳統既《Minecraft》又點呢?多人建築遊戲講求團隊合作,一唔係你就有朋友一齊玩,一唔係就玩緊果陣識到新朋友。呢類遊戲最大既死症係本身多數冇故事,而且同所有既 Online Game 一樣,又要約人同就時間上線,最緊要係我又冇乜朋友丫嘛,玩條毛咩!

我承認我真係一個好麻煩既人,又唔想同其他人一齊玩,但如果要我自己一個起野我真係頭都爆。我唔係特登要讚《Death Stranding》,但係你又點能夠估得到佢可以將呢兩種類型既野結合埋一齊,變左做一隻 Offline 既 Online Game 呢?

當你一諗到,自己起既野唔單止係為左自己可以容易啲去到主線既終點,而係可以造福到所有有緣使用、但無緣相見既其他玩家,條氣即時順左好多。而又如果你好似我咁係一個死懶鬼,咁又有咩開心得過係一隻有建築系統既遊戲入面,有人幫你起好哂所有野丫!諗起都爽死呀真係!

 

 

因為所有人都要第一次經歷過段路先可以用到其他人既設施,所以一定有動機起野,同時亦有限制同一個地區最多既設施數目,再加上設施會損耗有誘因令其他人去修補維持社區關係(咦?)

相較於《Death Stranding》係好多 Gameplay 方面既略嫌沉悶或者不足,其實佢最比心機整既就係呢個共同建築系統,而且仲保證唔鍾意起野既玩家都享受得到!

 

 

在開放沙盒世界中,認真說故事

能夠真正係 Sandbox 世界入面講故事既人,其實好少,因為開放世界類別入面其實好少沙盒遊戲。所謂既 Sandbox 係玩家真係可以同個世界,唔單止係入面既角色,做交流同互動。

即係《Minecraft》你可以自己挖材料起一個新世界出來,又或者《Zelda: BOTW》咁可以做唔同既場景破壞以達致戰鬥或者解謎既後果,然後?冇例子喇!《SKYRIM》你可唔可以炸左個山之後所有人都知冇左座山丫?《GTA》你又可唔可以炸哂成間銀行導致以後冇人可以係果度打劫?

所有真係有故事內容既開放世界遊戲,都唔容許你咁做,因為佢地要做好多好多野,去修補關於敍事既後續,遊戲內容又咁多,幾乎冇可能完成。係呢一方面,《Death Stranding》就嘗試左一種類似《BOTW》既折中方法,就係開放世界入面絕大部份地方唔講故事,只要去到主線既時候先睇返 CG 同回憶。

 

 

而呢幾段 CG 同埋回憶就係展現遊戲故事性既功力所在喇!當然,《BOTW》要講既係一個相對比較簡單既故事,因為好多背景同埋世界觀係好多集《Zelda》都共用既,本來就唔洗多作解釋,而且 Link 既目標都只係傳統救返公主打贏 BOSS 就得,其實唔洗講都明。

但係《Death Stranding》背後就係一個痴撚線既故事。當然遊戲入面有好多額外既收集資料同埋文字檔做補充,但係主線既CG 同回憶入面,小島神展現左乜野係所謂普通人所不能既功力,去盡量一次過解釋哂成件事。

而最後所有既故事時間線,機構勢力,人物關係,愛恨交纏係真係深入講解得來大家又會明……到大部份啦,呢個先係《Death Stranding》最容易被忽視既優點(因為一大堆 PK 第一條長 CG 都未開始播就話行路行到好悶丫嘛)

 

 

而且有好多段既回憶係以激烈既槍戰來表達,令大家明白故事既含意之餘,都唔會真係得個睇字,對於一直以來播 CG 就真係淨係播 CG 既小島來講,都算係一個好大既進步。

亦都係因為咁,小島亦都明白自己隻 Game 唯一需要忌憚既就只有冇耐性既玩家,而佢既推斷係冇錯,面對呢啲指控,真係要慶幸我係一個故事大於一切既 Gamer。

 

 

如果有下一集

不過,呢隻遊戲都唔係十全十美既,至少係我眼中佢甚至講唔上係 2019 年最好既遊戲。《Death Stranding》既世界寬廣而空曠,但因為有得同其他玩家互動建築,所以每一處都係度吸引緊玩家去同個世界互動,但個遊戲就好少主動出手同玩家作出互動,真係一個敗筆。

遊戲入面除左主線劇情之外既 BT 鬼魂,都會係固定地點,依照遊戲內天氣既變化係唔同時間出現,都算係有少少不確定性。可惜遊戲入面既主要敵人就全部都係固地巢穴不停重生,就真係好討厭。就唔可以有半途伏擊玩家既山賊咩?或者行行下有個人踩電車出殺出搶左主角啲貨又得唔得?

 

 

遊戲入面其實好多既山路玩家都係冇發挖過,整一個固定既遭遇,吸引玩家去特登行某條路,上某啲山,完成哂成個盜賊營地之後俯瞰下故意安排既山境又如何?

仲有好多自己人,如果你清完付近既盜賊營地,佢地就會安心咁出行去送自己既貨,但點解從來唔會有人攔路截劫佢地要主角去救既?仲有隻 Game 明明就有限時送貨系統,但點解又會冇一年一度既「UCA 送貨鬥快比賽」之類既活動呢?點解主角不停咁係路邊執蟲食,但係明明周圍都係河流,又唔釣魚?

Chiral Printer 連架貨車都 Print 到出來,點解唔比玩家起個碼頭,Print 啲船出來過河過湖遊船河?明明 Chiral Printer 既技術就係可以將所有野回收做基本物料,然後再 3D Print 返做你想要既藍圖,咁點解主角唔可以挖礦呀?咁起碼主角就已經唔再需要不停咁虐待啲盜賊再攞走佢地啲資源啦!

真係挖啲礦出來起路建橋,會唔會有趣過不停來回倉庫搬啲野出來做建築呢?

 

 

呢隻 Game 係既有既局限入面其實可以有更多唔同種類既創意,而呢啲缺失可能就係地圖個空曠感既來源,如果可以令到玩家行去每一個方向都有更多既新發現,我相信隻 Game 既負評可以一掃而空。

新遊戲開發同送貨一樣,都冇得 Fast Travel,但每踏實地行出一步,都會使你離夢想更近。

 

 

總結︰壯麗既景色、孤獨既腳步,但又有同心合力起出來既建築,再加上驚心動魄既故事展開,《Death Stranding》無一處不令玩家留下深刻印象。只可惜遊戲設定上以及設計上有更多可以深化既創意,始終未能實現。

現階段來講,會唔會有《Death Stranding 2》,又或者小島神真係轉行做電影,都係未知之數。如果咁大個世界觀只係用來玩一集,未免太過可惜。

最終評分︰75

故事並冇想像中咁長,行路既部份仲比想像中短,無論基於咩原因去嘗試,都係值得一玩既作品。

 

 

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 [email protected]

 

Peter The Gamer

人生如遊戲,我就係PETER,玩既係人生,唔會有個更好既名。 有時寫下評論,多數介紹下GAME。分享、批判遊戲。

追蹤

Facebook 更多文章