日本 RPG 大社 Falcom 公司旗下嘅其中一個系列《英雄傳說 軌跡系列》一直擁有大量 Fans，其精彩嘅故事，宏大嘅世界觀，一直受到玩家盛讚。

《軌跡》系列世界龐大，官方今日宣佈，並稱為「英雄傳說VII」嘅《碧之軌跡》及《零之軌跡》，將於 2020 年春季以高清姿態重新登錄到 PS4 平台上面，名為《英雄傳説 碧之軌跡：改》以及《英雄傳説 零之軌跡：改》，正式發售日有待公佈。

《零》與《碧》分別於 2010 年及 2011 年初次登錄 PSP 平台，後來亦曾移植到 PC 及 PSV 上面，兩者推出時間雖然為《空軌》之後，不過故事實際發生時間與《空軌》可以話係同時進行；而遊戲系統亦承繼了《空軌》嘅傳統 RPG 模式。兩者同為 當年嘅玩家最愛遊戲作品。

今次嘅高清製品中，主線故事將以全語音登場，同時可以採用高速模式（探索時為兩倍速、戰鬥時為四倍速），動畫及事件亦可以 Skip，方便想重溫遊戲嘅舊玩家。畫面方面，將調整至切合 PS4 質素嘅 60fps，音源亦有重新處理，務求帶比玩家煥然一新嘅感受。

《軌跡》系列發展至今，最新進度為即將於 2020 年下半年推出嘅《創之軌跡》；而《零》《碧》嘅角色亦會再次於《創》裡面登場，所以如果有意慾想從頭開始了解《軌跡》系列嘅朋友，或者今次嘅移植對你地黎講係一個好機會；不過注意返今次嘅移植為日文版本，繁體中文版本還有待香港 PlayStation 再作公佈，有最新消息我地會再同大家報導。