雖然 PS5 即將於今年 12 月推出，不過根據外媒 GamesIndustry.biz 嘅報導，Sony PlayStation 今年將繼續不參與 E3 2020，而 PlayStation 亦將會成為首個連續兩年唔參加 E3 嘅大機構。

SIE 自 1995 年開始，每年都會出展 E3；不過，佢地今年就表示，公司雖然對於舉辦 E3 嘅機構 Entertainment Software Association 抱有極大敬意，只不過認為 E3 嘅設定與佢地今年嘅商業方針唔係好夾，所以先會決定繼續唔參加 E3 咁話。

今年係 PS5 推出嘅年份，或者 SIE 唔想自己嘅消息獨領風騷，又或者係想善用去年新增嘅自家「State Of Play」平台，所以佢地唔入 E3 其實都係意料之內。

不過，E3 2020 再次欠缺 PlayStation 參展，到底會唔會影響活動嘅吸引力呢？2020 年下半年嘅遊戲消息目前仲係非常神秘，話唔定會有廠商帶來意外驚喜！作為玩家，相信大家都係一樣咁期待 E3 2020 同埋 State Of Play 的。

至於 PS5 會於幾時公佈詳細資料，有新消息我地會再同大家報導。