《人中之龍 Online》遊戲於 2018 年 11 月開始正式營運，不過只有日本區版本。 SEGA 今日就宣佈與台灣大宇（SOFTSTAR ENTERTAINMENT Inc.）旗下嘅子公司 Loftstar Interactive Entertainment Inc 簽左授權書，即係話《人中之龍 Online》即將會推出繁體中文版，伺服器由港澳台三地共用。

正在日服進行《人中之龍維新》活動

《人中之龍 Online》為《人中之龍》系列嘅正統續作 Online Game，對應手機及 PC 平台。截至 2019 年 12 月尾為止，日本方面用戶超過 200 萬人，雖然有部份玩家對於遊戲中嘅卡牌型玩法唔太欣賞，不過遊戲依然有一定捧場客。

至於大宇，相信有玩開華語 RPG 嘅朋友一定都有聽過佢地嘅名，經典名作《軒轅劍》及《仙劍奇俠傳》系列就係出自大宇之手；手機遊戲興起之後，大宇亦有從事手遊代理嘅工作。

遊戲嘅港台服目前未公佈正式上架日期，不過各位讀者，你地又會唔會有興趣玩呢隻《人中之龍 Online》呢？

以春日一番為主角嘅《人中之龍 7》PS4 遊戲亦已經於 2020 年 1 月 16 日上架！