【遊戲新聞】《Overcooked》團隊力作《Moving Out》今次友誼決裂導火線係玩搬屋

 

曾經發行大熱合力作品《Overcooked》系列嘅發行商 Team17 Digital 又有新搞作,今次聯同工作室 SMG Studio 及 Devm Games 再次推出考驗人類感情嘅新遊戲《Moving Out》,預計 2020 年 4 月 28 日推出,對應平台為 PS4、XBox One、Switch 以及 Steam。

 

 

《Moving Out》裡面,玩家飾演搬屋公司嘅一員,無論個客要搬嘅野有幾咁多、要搬去嘅地方有幾奇怪,一律照單全收;有玩過《Overcooked》嘅朋友應該都會記得,每個關卡嘅場景係可以有幾咁出乎意料!

 

 

遊戲當然唔係淨係搬屋咁簡單,到底點樣可以用最短時間搬哂啲野?例如係將屋主隻狗掟出窗外邊會唔會快啲?到底運送過程會唔會整爛啲傢俬?呢一切元素,留待完成任務之後,屋主比幾多評分你就會知道收唔收貨。

《Moving Out》再次考驗玩家團隊合作性,絕對可以想像將會再次掀起新一輪玩樂熱潮,大家又會唔會將遊戲列入今年必玩清單呢?

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章