【影視感想】《猛禽小隊:小丑女大解放》齊上齊落女子組

DC 最新電影作品《猛禽小隊:小丑女大解放》《Birds of Prey: And the Fantabulous Emancipation of One Harley Quinn 》上星期上映,繼 《Wonder Woman》後再以女性做主導嘅英雄(打壞人都算係嘅…)電影。

以一個知名度未太高嘅漫畫題材改編嘅電影作品,究竟處理得好唔好?以下係編輯部對呢部 「DC女子組」電影嘅小小感想。

 

 

咀炮講故仔次次掂!?

講返 Marvel 少少嘢,係電影《 Avengers: Endgame》中最終決戰,有一幕眾女英雄合作,仲幫蜘蛛仔解圍,畫面的確特別;但如果拍一套電影作品效果又會如何?DC 今次就搶先試一次比大家睇。

電影由華裔女導演閻羽茜(Cathy Yan)操刀,故事講述小丑女 Harley Quinn 比 Joker 飛咗,心情傷心之餘,仲比全葛咸城黑白兩道追捕,仲捲入爭奪黑幫家族鑽石事件,大難臨頭女人們要站起來,聯同 The Huntress 、Black Canary 、差婆 Renee Montoya, 一邊保護 Cassandra ,一邊對付黑幫二世祖 Black Mask。

故事無太大驚喜,電影開頭已經有重重嘅「 Deadpool 味」,由 Harley Quinn 以咀炮方式貫穿整齣電影,以非線性敘事方式鋪襯故仔,略嚴有啲亂,但的確比先前《Suicide Squad》爽快得多。

講到《Suicide Squad》,今次亦以相近方式介紹各主角,問題就黎啦,除咗 Harley Quinn 較為觀眾認識,其它角色對觀眾黎講都算幾陌生,Black Canary 都可能叫好少少,電視劇《The Flash》都有認識下(當然係唔同版本啦),但黎到今次電影,交代角色背景好唔清楚,令到普通觀眾難以投入,勸大家入場前做下功課先。

 

今年 Halloween 應該成街「量產型」

 

動作場面夠爽夠靚、角色刻畫唔夠盡

動作場面暴力得黎又未到 18 禁血腥,我覺得啱啱好,起碼觀眾較易受落,鏡頭無特別花巧,動作爽快型格搭夠,娛樂感十足,大玩顏色美術,非常賞心悅目;加上整齣電影由唔同嘅爽快曲目帶動,歌曲帶動畫面,視聽享受。

華裔女導演鍾情港產片,特別尾場嘅追逐戰,參考咗《奇謀妙計五福星》,對香港觀眾應該有好深感受。

奸角 Black Mask 由飾演過 Star Wars 經典角色 Obi-Wan 嘅 Ewan McGregor 擔任,感覺上真係唔夠奸、唔夠惡,當中玩舞女嘅場口,亦「到喉唔到肺」,對於漫畫 Fans 可能有d失望。

其它角色亦好模糊,當然唔關小丑女性唔性感事,睇完好似得小丑女同個差婆有多少少印像,係大眾都對呢個故仔認知缺乏嘅情況,角色描述處理略嫌失色,變咗整齣電影成為「小丑女傳」咁,有少少浪費咗「Birds of Prey」呢個小隊嘅感覺。

 

唔夠奸唔夠惡

 

整體黎講,整齣電影有住《神探俏嬌娃》加《東方三俠》嘅味道,亦不禁會拎去同樣都係反英雄小隊電影《Suicide Squad》作比較,編輯部都覺得今次會較為好睇。

縱使今次角色描述失色,故事簡單,但動作畫面,音樂、以及整齣電影爽快度,喺娛樂片角度睇,的確略勝一籌。

當然不算得叫非常好嘅 DC 電影作品,但如果你係 DC fans,又鍾意小丑女、又或者每逢 Halloween 都 cosplay 小丑女嘅你都值得入場睇下。

艾力

艾力 幪面超人頭號粉絲,玩具figure 無一不歡,極喜歡玩潛入式遊戲。怎吃也不胖,只因最喜歡「食字」﹗人生座右銘是「自作樂,很快樂」。

追蹤

更多文章