【遊戲新聞】炸彈人戰鬥風格 RPG《Bombing Quest》今次做勇者唔拎劍,要拎炸彈!

 

《炸彈人》絕對係大家耳熟能詳嘅經典遊戲,但係有無諗過《炸彈人》嘅玩法,可以套用到 RPG 裡面?黎自保加利亞嘅獨立遊戲工作室 Team Puh 就受到《炸》啟發,開發左名為《Bombing Quest》嘅 RPG 遊戲,對應 Steam 平台,預計 2020 年 3 月 4 日正式上架。

玩家於《Bombing Quest》裡面飾演一個失去記憶嘅矮人,某天你於古代寺廟中醒來,而你身上穿著一套搭配神秘力量嘅機甲裝束,而機甲內置的迷你機械人將會係你旅途上嘅同伴。

 

 

所有人類已經定居於舊帝國的廢墟上面,而周遭有魔物四處漫遊,各式危險嘅蟲獸亦於黑暗中潛伏,而古代殘餘落黎嘅各式機械體亦在蠢蠢欲動。《Bombing Quest》嘅世界觀非常有趣,既有古代遺跡,亦有超自然元素,而玩家嘅責任,就係對抗所有嘗試危害世界嘅事物。

 

 

遊戲採用半開放世界形式,玩家可以自由於地域裡面探索,旅途中亦會遇到 NPC 可以接支線任;而最重要嘅部份,當然就係每個地域裡面嘅各式戰鬥。

 

 

戰鬥帶有濃厚《炸彈人》味道,不過玩法就變得更加多元化,唔單止敵人嘅種類變多,玩家可以使用嘅「炸彈」亦有極多選擇,有輔助技能,亦有屬性之分,有物理攻擊,亦會有魔法元素;而當中最考技巧嘅,就係觀察敵人嘅動態、推測對方嘅行走路線,從而將佢狠狠炸飛,勁過汽油彈!

 

 

相比起傳統炸彈人,今次嘅呢隻致敬遊戲,仲容許玩家好似 RPG 咁提昇自己嘅 HP 同 MP、亦可以有裝備上嘅變化,鐘意玩動作策略遊戲嘅朋友不妨去 Steam 留意下。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章