【遊戲新聞】新式射擊遊戲再無豬隊友 《Quantum League》因為隊友就係你「自己」

大家玩 FPS 遊戲果陣係咪好憎遇到豬隊友呢(特別係 R6 TK 果啲……),黎自阿根廷嘅遊戲工作室 Nimble Giant Entertainment 就開發咗隻新遊戲《Quantum League》(量子聯盟),遊戲最特別嘅地方就係你無得再賴隊友害死你,因為你嘅隊友就係你「自己」。

 

 

《量子聯盟》(Quantum League)故事講到喺未來世界專業級運動已經改變,最新興起嘅運動「量子聯盟」唔再係只著眼於身體能力,仲講求過去與未來嘅合作能力。而本作基於呢個故事背景,創作出呢隻擁有嶄新概念嘅競技向射擊遊戲,遊戲最大支援 2 vs 2。雖然每隊最多只有 2 位玩家,但場上會出現最多 3 vs 3 或者 6 vs 6。就咁講當然好難明,因為呢個遊戲採用一種全新嘅規則「Time Paradox Shooter」(時間悖論射擊)。

 

 

遊戲分為三個回合,每個回合只有十五秒,初始有五種武器、四位角色選擇。當第一局開始後,玩家如常對戰,而重點在於扣晒血「死」咗之後。

 

 

當玩家「死亡」之後,會進入一個叫做「Desyned!」嘅狀態,係呢個狀態下玩家仍然可以持續控制角色行動,不過無論你點開槍都唔會對敵人做成任何傷害。有趣嘅係系統會紀錄低「Desyned!」狀態下玩家嘅行動,而呢個紀錄將會喺下一回合中變成由 AI 操控嘅隊友,不過所謂嘅操控其實都係 Loop 返你之前嘅動作。

亦即係話,因為你知道對上一次點死,然後下一次打算先發制人,但敵人同時又「預判」到你有呢個行動,於是大家就瘋狂表演進入八奇領域,令敵人知道你下一步!

 

 

另外遊戲中有個補血道具,執咗之後除咗補血之外仲可以令到進入「Desyned!」狀態嘅玩家復活,亦即係可以對敵人重新做成傷害。但緊記執道具呢個行動同樣會被紀錄,所以下個回合敵人都係會知道你想做乜的,到底點應對就係呢個遊戲好玩之處。

 

 

《量子聯盟》(Quantum League)呢隻咁新穎玩法嘅 FPS 遊戲喺今日( 2 月 21 日)正式展開免費公測,暫時有「Death Match」、「Control」同「Domination」三種模式,有興趣嘅玩家上 Steam 度試下啦,免費架。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章