【遊戲新聞】《羅德斯島戰記》動作遊戲化!類《惡魔城》高難度遊戲 3 月登場

 

由水野良老師創作嘅經典歷險小說《羅德斯島戰記(ロードス島戦記)》可以話係日本國民級嘅作品,由 1988 年開始出版至今,於海內外都擁有唔少 Fans,小說亦有唔少衍生作品。

 

 

角川早前預告《羅德斯島戰記》將會動作遊戲化,最近終於有確實消息公佈!《羅德斯島戰記》將會改篇為 Metroidvania 遊戲(類銀河戰士・惡魔城風格橫向動作遊戲),並將於 2020 年 3 月 13 日於 Steam 平台上作先行販售,定價為 1,320円(預計 HKD 92 左右),而遊戲推出初期會有九折早鳥優惠。

 

 

遊戲全名為《Record of Lodoss War-Deedlit in Wonder Labyrinth-》,由 Team Ladybug 工作室開發。遊戲以《羅德斯島戰記》世界觀為主軸,並以精靈使者ディードリット(Deedlit)為主角。玩家於旅程中會遇上唔同嘅角色,亦會獲得唔同精靈嘅力量,從而去完成你嘅歷險。

官方形容故事係 2019 年小說《羅德斯島戰記 誓約的寶冠》嘅劇情補完,如果你本身都係小說 Fans,今次嘅遊戲更加不容錯過。

 

 

遊戲共有六個關卡,而於 3 月份上架嘅早期版本裡面,就率先開放第一個關卡供玩家遊玩。玩家於旅程中可以隨住擊破敵人而獲得新武器,而武器種類亦十分多元,包括槍、劍、弓箭等等;而敵人戰敗後亦會掉落碎片,玩家收集呢啲碎片,就可以強化精靈嘅力量,令自己變得更強。

 

 

遊戲工作室 Team Ladybug 曾經開發 Steam 平台大熱作品《Pharaoh Rebirth》,亦曾開發東方系列嘅類惡魔城遊戲《Touhou Luna Nights》以及《Fate/stay night[Heaven’s Feel]I.presage flower》BD 版本嘅特典遊戲《RUN!RUN!ランサー》,富有製作 2D 動作遊戲嘅經驗,所以呢隻《Record of Lodoss War-Deedlit in Wonder Labyrinth-》亦有信心保證。

遊戲目前將對應日英語(仲有殘體中文…),有興趣嘅玩家可以到<Steam 頁面>入手。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章