【玩物花絮】娃娃屋式LEGO天守閣 創作背後有段故

我相信好多有返咁上下年資嘅玩家,點都有期望過 LEGO Ninjago 呢個系列可以重現返九十年代尾一系列日本武士/忍者主題嘅產品。結果最終都唔係嗰回事,要復興返當年嘅日本武士/忍者主題感覺,依家都只能夠靠 LEGO Ideas 嘅作品先可能有多少少機會。

Soutou Tenshu, Japan’s Forgotten Past by Eric Ebquario aka. Horlack

Soutou Tenshu, Japan’s Forgotten Past 呢個作品先由外表睇起,以日本「十二現存天守」最細嘅丸龜城做藍本,但係想表達嘅係已經消逝於歷史中嘅小天守建築。作品最特別嘅地方係喺底座設計上加左活動鉸位,成個建築可以以「娃娃屋」或者 LEGO 街景大屋 (Modular Buildings) 兩種格式去打開。而且用埋 LEGO 火車常用嘅磁石接駁件,加強密閉情況下嘅結構完整性。

點解會咁設計,原來三年前想砌件 LEGO 作品比侄女嘅時候,發覺 Modular Buildings 呢個結構對細路仔玩起上嚟好困難,結果就諗到呢個活動鉸位結構出嚟。作為 Uncle 嘅 Eric 就想砌返個作品比侄仔去賀佢今年畢業,而佢侄仔係 LEGO Ninjago 嘅超級 Fans,結果就決定用日本式城樓開始呢個計劃。

 

雖然結構咁複雜,但係大家都見到每一層嘅內裝都非常充足。雖然唔係好似大家印象中嘅趟門、屏風,但係就有住種戰國陣中城池風格,內裡所有都係為備戰而設。

城樓地下見得到入面有齊武裝、鐵匠工具同埋最重要嘅清酒!Eric 話「No Sake, No Japan. (笑)」

一樓就有煮食同休憩空間,仲有個小型訓練設施

頂層就係城主休息室同書房

Soutou Tenshu, Japan’s Forgotten Past 前半「Soutou Tenshu」大家都明白代表小天守啦,但後半「Japan’s Forgotten Past」原來都有段故。製作者 Eric 講到喺日本中世紀連戰國都未到嘅時候,女兵已經佔軍隊中三成人數,可惜男尊女卑加上當時嘅史官都以男姓為主,所以女武士嘅事跡就喺當時嘅歷史中抹走。而呢個作品所講嘅「Japan’s Forgotten Past」,就係想記錄被遺忘嘅女武士。

意義爆晒燈嘅作品,我就已經比左 Support 啦,你都鍾意嘅話快啲去下面嘅傳送門投一票比佢啦!(作品睇完,下面仲有後記)

Soutou Tenshu, Japan’s Forgotten Past  LEGO Ideas 傳送門


後記

講咁耐,砌作品比侄仔、侄女玩,咁點解又歷史故事又放埋上 LEGO Ideas 搞咁大龍凰做乜呢?Eric Ebquario 呢個法國製作者,原來仲有個故事想同大家講:

「我今年 45 歲,喺我大學期間我認識到 Karine Hirotani ,佢係一個法裔日本女孩,係佢介紹左宮崎駿嘅漫畫同日本文化比我認識。我承認佢嘅出現係對我嘅人生產生左強烈嘅影響。呢 23 年嚟雖然冇再見過佢,但係我一直無忘記過佢。」原來搞咁多野都係為個「情」字。「呢件作品唔只係一件 LEGO 創作,佢仲包含住親情、人性、歷史,某程度上仲代表住一個法國男孩對一個日本少女嘅思念,而且呢份感情係會一直落去。」法國人浪漫就公認,但長情如此,我都有啲感動。「 23 年前,我偷偷地收起左佢嘅一頁論文,入面有佢親手寫嘅名同地址。雖然我地冇再聯絡,但係呢張紙,一直放喺我第一本宮崎駿嘅漫畫入面。」

最後我問到,如果《Soutou Tenshu, Japan’s Forgotten Past》可以得到 10000 支持,你會唔會喺官方訪談度點多謝佢?「 I would dream of seeing her again.」

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章