【遊戲新聞】搞笑動物格鬥遊戲 《動物之鬪》追加新角色NS版發表

早幾個月咪出咗動物格鬥遊戲,入面啲角色全部係「二足步行貓」、「右勾拳柴犬」呢類網上爆紅嘅「幻獸」。同我哋之前嘅估計一樣,台灣製作團隊 Digital Crafter 日前正式宣佈《動物之鬪》(Fight of Animals)即將推出 Nintendo Switch 版本!

 

 

《動物之鬪》(Fight of Animals)係以近年用「錯位拍攝」爆紅幻獸進行一對一嘅格鬥遊戲,支援線上對戰。呢堆搞笑幻獸有「二足步行貓」、「肌肉狐狸」、「猩猩烏鴉」、「右勾拳柴犬」、「魔法松鼠」同埋「肌肉白鯨」等等,每位都獨當一面,下面分享對比圖片。

 

仲有其他潛力角色,好似旋風飛行犬、操水之虎、土魔法松鼠之類,唔知之後會唔會出埋

 

遊戲系統非常簡單,都係得輕、重、特殊鍵三粒制,同時亦有專為新手而設嘅簡易操作,簡單按鍵就可以使出 Combo 連技。另外本作亦都有超必殺技,只要於戰鬥過程中攻擊、被攻擊就會累積超必能量,儲滿時按特殊鍵即可,非常簡單。而能量亦可以用於防禦,使出方法係被攻擊或防禦時按特殊鍵,就會爆開對手,有利重組攻勢。

 

 

《動物之鬪》(Fight of Animals)NS 版將會一拼收錄 Steam 版二隻新角色狡詐狐狸(Tricky Fox)以及壞狗(Bad Dog),只要喺最後一關打敗佢地就可以解鎖使用。遊戲預計於 3 月下旬發售。

五木

五木 動漫電玩宅,極愛金田一系列,擅長動作及策略遊戲

追蹤

更多文章