【遊戲新聞】獵奇脫出遊戲做錯一步就爆血《滅:這次糟糕了》日版恐懼鬥室拯救少女

 

今次介紹嘅《滅やばたにえん(台譯:滅:這次糟糕了)》係由 Yotalien Games 工作室開發嘅獵奇解謎遊戲,前身為於 2019 年推出嘅手機遊戲《やばたにえん》。《滅》可以話係原作嘅加強版,加入左新關卡以及修正要素,即將於 2020 年 2 月 27 日登錄 Switch 平台

 

 

遊戲概念非常簡單易明,玩家發現自己被困於神祕大屋當中,而大屋裡面滿佈變態而殘忍嘅機關。你嘅任務唔止係脫出咁簡單,仲要同時救出大屋裡面身陷險境嘅八位少女。你可以於一路上得到工具或者提示,去解開少女們身上嘅機關。

 

 

不過,喺遊戲中好易領便當,因為你每一個行動,都會影響到其他地方/其他機關/其他陷阱嘅動向;所以,見到有制都唔好亂撳,如果抱住「是但啦,試左先」嘅心態去進行每一個步驟,可能下一秒就死多一個人了。

 

 

遊戲難度在於,玩家身上只可同時持有四樣道具,而遊戲中係有時間流動嘅設定,所以你揀錯道具又唔得、行動太慢都唔得,絕對考驗你嘅 IQ 同 EQ!

遊戲中有多種結局導向,視乎你最後救到幾多人出黎。至於救唔到嗰啲,先此聲明,遊戲雖然用點陣圖風格製作,但係少女們中陷阱死時嘅爆血畫面,依然真實殘忍,所以呢隻遊戲喺日本被列為 CERO Z(18 禁),接受唔到獵奇風格嘅朋友請多加注意。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章