喪屍射擊 Game 有一種特別嘅魔力，自從《Left 4 Dead》系列推出後大受玩家歡迎，而且仲吸引唔少女性玩家加入殺喪屍行列。早前就出咗隻四打喪屍 FPS 遊戲《Zombie Army 4》，話就話係喪屍 Game 但完全唔驚，而且仲趣味性十足，真係忍唔住要同大家推薦下。
《Zombie Army 4》由英國遊戲廠商 Rebellion Developments 製作，佢地最為人所熟悉嘅作品應該係《Sniper Elite》（本作係佢嘅衍生作品），早二年出果隻《異國探險隊》同樣係佢地出品，屬第三身射擊遊戲，最大支援四人遊玩。
之前隻《異國探險隊》都有唔少玩家落坑
遊戲畫面表現合格，當然就唔會話去到 3A 大作果種 Level，不過都見得人完全唔失禮。畫質可以選擇 1080p@60FPS 又或者 4K@30FPS，而我哋玩時主要都係用 1080@60FPS，就算遇到喪屍潮暴走都唔太覺有 Drop Frame 情況出現，射擊感亦算紮實，係用腳踩喪屍時質感唔太夠扣咗少少分。
畫面表現合格，遊玩時整體頗流暢
講完畫面就講係玩法，雖然主要內容同一般 FPS 一樣都係見人就殺，不過本作就加入 Combo 系統，令到遊戲性更高。遊戲入面分別有三招技能，隨時間回復嘅「特殊近戰」、類積連續十殺充能嘅「擊殺」以及對應武器嘅「超必殺技」。除咗「特殊近戰」之外，其他二種都需要連續擊殺敵人先會充能，而每次擊中敵人後會有大約十秒時間比你接 Combo，只要繼續命中就可以不停延續 Combo。
要 Keep 住搵喪屍殺，又要兼顧彈藥補給，你估咁易
就咁睇好似好簡單，但當同場有 NPC 或者其他玩家就會有「搶怪」情況出現，加上萬一玩家射失 Miss 的話，係會扣除接 Combo 時間。即係話每一槍都要好小心唔好 Miss，亦都盡量避免同隊友搶怪，同時又要避開敵人嘅攻擊，要兼顧各個情況就係本作好玩之處。
好似呢啲位就好尷尬，二招技都未充能，周圍又無怪，基本上斷硬 Combo
戰鬥中有時會做成暴擊，呢個時候畫面就會切換至充滿電影感嘅擊殺鏡頭。畫面會用慢動作展示子彈由槍口射出，直到擊破敵人身體器官整個過程，真正百看不厭。
最高難度有 Friendly Fire，連子彈彈度都會改變，難度直線上升
本作同其他喪屍遊戲一樣，一般喪屍以外亦有多種箐英喪屍，有超厚甲嘅、有高攻厚血嘅、亦有會召喚怪的，各有特別之處。而當中厚血嘅幾種箐英喪屍，受到一定傷害時會跪喺度，呢個時候衝過去用「擊殺」就會一擊必殺。而另一種箐英將軍則會不停召喚強化喪屍，兼且接近有無限復活嘅能力，先要射 Down 佢再過去用「踐踏」踩碎條屍先叫正式 KO。遊戲去到中段就會有各種箐英喪屍混雜嘅關卡，面對住喪屍海仲要 Keep 住唔斷 Combo，一班人玩的確非常高興。
呢種重甲喪屍已經係最廢果種
喪屍坦克咁有創意都比佢諗到，係好野
戰鬥系統做得好，其他細節都無忽略。喺戰役模式中每一關都會有幾個小任務，分別係收集文檔、漫畫、升級包，而且都收得幾密下。另外每關都會有隻「手」會走黎走去（愛登士家庭果隻咁），擊破佢同樣係小任務之一，每次出現嘅位置都好出人意表，喺呢度見到製作團隊嘅心思。
愛登士家庭隻手，每次出現嘅位置都好出人意表
偶然會出英雄任務，大部份都係爭分奪秒嘅救人任務，都唔易玩
同《異國探險隊》一樣，間唔中都有謎題要玩家解開。但因為唔係「必需」嘅關係，謎題難度比起前者更高。往往需要喺極少提示下解謎，而且多數只有一次機會，錯咗就要成關再打過。試過有街客走入我個場亂打，搞到我解唔到謎，結果我踢佢出房再傳訊息過去問候佢全家。
呢個應該係最多人炒粉嘅謎題
每間安全房都有洗手盤，時刻提醒大家要勤洗手，果然係抗疫遊戲
《Zombie Army 4》初始有四位角色選擇，分別對應不同能力，不過就無需分開升 LV，而技能樹以及槍械都係共用的。每種技能都會有解鎖條件，每個技能分別要三級，要令升級都必需完成相關嘅條件，而且仲幾好玩。好似初始神技「重獲新生」最後升級條件就係要於瀕死狀態復活後後三秒內達成十五殺，極有挑戰性。
呢招真係神技，打最高難度必備
槍械升滿後就會出現精通條件，多數都幾好玩
戰役故事模式外，屍群（持久戰）都好好玩，配合度差啲都輸
總結
以喪屍 FPS 遊戲黎講，《Zombie Army 4》射擊感夠、畫面合格、劇情過癮、可以四打，基本上已經符合好遊戲嘅定義。而且本作係行幽默路線，恐怖感接近零，就算怕喪屍 Game 嘅女仔一樣啱玩，加上而家武漢肺炎肆虐，無得出街嘅情況下同朋友連線玩絕對係近期佳之選，未買嘅諗諗佢。
《Zombie Army 4》對應平台為 PS4（數位版請到美版PSN購買） / Xbox One / PC EPIC Game Store，現已推出。
VJGamer總編，細細個已經蒲機舖，機齡甚深，熱愛電玩文化。