世界末日人類滅亡其實都唔係咩新穎題材，但多數遊戲嘅劇情走向都係打爆侵略者 / 統治者一方。今次介紹嘅《The Uncertain: Last Quiet Day》雖然同樣係講人類滅亡，不過就用和平嘅方式去探索過去人類存在嘅文明，而家仲要限時免費送比玩家，真係唔玩都拎咗先啦！

《The Uncertain: Last Quiet Day》由俄羅斯團隊 ComonGames 開發，於 2016 年推出，屬冒險遊戲。故事講述人類因為戰爭而滅絕，世界由淨落黎嘅機械人統治。而玩家將扮演其中一隻機械人 RT-217NP，佢對滅絕嘅人類充滿好奇，到底因為咩原因而自我毀滅？人類過去嘅文明又係點樣？透過探索各地，解開各種謎題，以機械人嘅角度去思考人類世界嘅文明，鍾意呢類型遊戲嘅朋友真係要玩下。

《The Uncertain: Last Quiet Day》由今日至 3 月 9 日淩晨 2:00，於 Steam 上推出限時免費下載，只要將遊戲放入收藏庫就可以永久保留。另外仲有一個 Soundtrack and Artbook 嘅免費 DLC，記得下載埋丫！