【試玩感想】平行時空科幻奇想曲《十三機兵防衛圈》繁體中文三小時試玩版現已上架

 

由 VanillaWare 與 ALTUS 聯手推出嘅《十三機兵防衛圈》即將於 2020 年 3 月 19 日推出繁體中文版,而遊戲嘅「三小時免費試玩版」亦已經於 PS Store 上架。

VanillaWare 出品嘅遊戲一向都有信心保證,所以各地玩家早於遊戲宣佈之時便抱有極高期望;而事實上,《十三》於 2019 年 11 月28 日喺日本推出嘅時候,唔單止大獲好評,實體版本仲一度賣斷貨!網上面嘅讚賞之聲一直不斷。

 

 

《十三》嘅舞台設於即將毀滅嘅日本,並以 13 位少年少女為主角,令玩家循住佢地各自嘅視點,從而多角度地了解故事。

 

官方宣傳圖上展示 13 位主角們

 

不過,遊戲並唔係平鋪直叙地講緊「十三個學生勇武救地球」嘅故事,而係牽涉到幾個年代牽涉到當時二戰時期日本與美國之間「太平洋戰爭」,係一個非常宏觀嘅時空穿梭異聞錄。

 

唔同時期嘅日本,居然係以區域劃分?

 

聽落好似好複雜?係,《十三》係一個劇本構成非常複雜嘅故事,由平行時空講到複製人,絕對需要玩家認真睇劇情。不過,複雜唔代表艱澀難明,加上今次遊戲推出嘅繁體中文版本,同日文版本相比,翻譯做得非常好,如果係想入手《十三》嘅朋友,請放心享用遊戲。

 

除左時空劇情,角色們嘅情感互動亦為劇點注目點

 

至於今次呢個試玩版,可以話係正式版《十三》嘅導讀版本,一方面快速地令玩家了解遊戲運作,同時亦成功留低各種故事伏線。你唔信?重申,呢個 Demo 已經上左架,如果你有興趣嘅,不妨下載黎感受下!

可能你都會同我一樣,一路玩,個心一路冒起「到底點解會咁?」「點解個時代又會唔同左?」等等疑問。

 

 

遊戲分為「究明」「崩壞」「追想」三個部份,簡單黎講,就係「探索」「戰鬥」「回憶」咁嘅意思。玩家於試玩版中,已可以玩到部份角色嘅起始路線,亦可以嘗試投身到戰鬥當中。

「究明」篇中,玩家可以進入各個角色路線去推進劇情,包括同其他角色或者物品互動,從而推敲下一步行動。

 

於該章節再無行動可進行嘅角色,名字會顯示為紅色

 

《十三》使用類似即時戰棋形式嘅系統,每個關卡有既定條件要達成,例如係指明要邊幾個角色出戰、又或者係要將損害值維持喺某個 Percentage 等等;玩家除左戰況之外,仲要關注角色嘅機兵能力值、以及留心戰鬥技能升級。

 

要傷害「機甲」敵人,就一定要使用「破壞機甲」嘅攻擊技能

 

對於玩慣 3A 大作或者 FPS 射擊遊戲嘅朋友,或者你未必會注意到呢隻非動作型嘅半 AVG 遊戲;不過,假如你對科幻題材有興趣,不妨試玩下呢隻《十三機兵防衛圈》,相信佢嘅故事導讀,一定會勾起你嘅好奇。

試玩版存檔資料可以過繼到正式版繼續使用,繁體中文版正式版推出日期為 2020 年 3 月 19 日。

十三機兵防衛圈 完整序章內容體驗版 傳送頁

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章