【遊戲新聞】一變四四變十二《Good Company》血汗工場經營模擬遊戲

 

「將盤生意分拆上市,再分拆,再上市」呢啲電影對白,我地講就講得多,不過要搞起自己嘅一壇生意,就唔係人人都成功,亦唔係人人都做到好老細。由獨立遊戲工作室 Chasing Carrots 開發嘅《Good Company》,或者就可以比大家一嘗做老闆嘅滋味。

《Good Company》係一隻經營模擬遊戲,玩家飾演一家高科技公司嘅社長,而你嘅遊玩目標,就係要不斷開發人力資源、提高研究技術,並致力於擴大設施,從而賺取巨額利潤,進一步就係將產品席捲市場。

 

 

遊戲概念絕對非常真實,而最真實嘅係,所有玩家嘅首個公司據點,就係你屋企個車房!聽落似乎真係成為喬布斯不是夢。

產品開發嘅種類由 GameBoy 到智能手機都有,除左要提昇技術之外,將產品投入生產線都係挑戰之一;而遊戲嘅另一重點,就係人事管理。到底要請乜野同事,同事又要身居乜野位置,邊個有才能可以升職等等,全部都需要玩家好好思考。

 

 

當然,你想一味賺錢,將公司變成富 X 康血汗工場嘅都係你嘅選擇……

 

 

《Good Company》將於 2020 年 4 月 1 日開始進行早期販售(Early Access),對應平台為 Steam 與 GOG;於 4 月 1 日前預購遊戲,Steam 平台仲會提供 10%折扣優惠(售價 HKD 98.1)。

早期販售包括兩個遊戲模式,分別為 Campaign Mode 以及 Free Mode。Campaign Mode 會有既定指引與目標要玩家達成;而 Free Mode 則任由玩家隨心地進行公司開發與經營。

 

 

早期販售期間預計為 8~14 個月,到正式版推出之時,將會有更多元化嘅要素加入遊戲,工作室亦打算加入多人遊戲合力模式,詳細消息就留待正式發售時再為大家跟進。

有興趣遊玩早期版嘅朋友:Steam 版傳送門

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章