【遊戲新聞】完全係「人在野」遊戲版 《Green Hell》多人模式與好友共闖叢林

「人在野」大家應該都有睇過,簡單講就係一個寫實節目,有條癲佬深入沙漠、森林等地方係極惡劣嘅環境下生存嘅過程。而上年就出咗隻遊戲《Green Hell》,入面係講玩家孤身一人深入叢林設法求生,基本上就係「人在野」嘅遊戲版,而日前官方就正式宣佈遊戲會推出多人模式,大家可以搵埋朋友一齊勇闖叢林!

 

 

《Green Hell》以亞馬遜雨林做遊戲舞台,採用第一身視點,屬於開放世界生存模擬遊戲。遊戲中玩家將面對孤獨一人、無糧水無工具、環境充滿變數,而且仲有個失散咗嘅女友等住你去救,面對種種困難下一邊求生一邊想辦法離開呢個「Green Hell」。

 

 

咁喺叢林入面生存必需學識各種求生技巧,例如製造工具、居所、武器等等,然後仲要學識打獵嘅技巧,同時亦要小心自己成為野生猛獸又或者係部落嘅獵物。除此之外,醫療亦都係玩家要著重嘅地方,因為受傷的話唔理個傷口會潰爛導致生病,仲有各種熱帶疾病,一個唔小心就會死亡。

 

 

黎緊將會推出嘅多人模式將會支援最多三位玩家連機遊玩,集合多人嘅力量會唔會有更高機率生存,定係比豬隊友拖後腿?想試嘅玩家 4 月  7 日多人模式將會正式上線。

 

 

五木

五木 動漫電玩宅,極愛金田一系列,擅長動作及策略遊戲

追蹤

更多文章