【遊戲新聞】搵笨 FB 手遊廣告 竟然有人真係整隻遊戲《Hero Rescue》出黎

大家有無成日喺 Facebook 或者手機遊戲入面見到一種廣告,內容係要你拉開條鎖匙去殺死敵人,但係唔係比熔岩燒死就係毒氣毒死等等,次次都總係失敗。然後包裝做「幾有趣嘅解謎遊戲」吸引玩家點擊下載,當然玩落就另一件事黎啦。呢種搵笨廣告手法越黎越盛行,但係廣告中嘅遊戲就遍尋不獲,最近就有人真係整咗隻符合該廣告內容嘅遊戲《Hero Rescue》出黎,非常搞笑。

 

應該大家都見過呢個廣告,你又有無中過伏?

 

近年呢類搵笨廣告越黎越多,最主要原因係收到成效(我都比佢呃過…….)。最先出現嘅應該一隻叫《Hero Wars》嘅遊戲,廣告「殺死地精」將遊戲包裝成解謎遊戲,實際上係一隻角色養成遊戲,而你喺遊戲入面當然就搵唔到相關嘅「殺死地精」內容…….。

 

 

然後另一隻《Gardenscapes》利用相似嘅手法,不過今次就係逃離井底,但同樣地將遊戲包裝成解謎遊戲,實際上佢係一隻三消遊戲黎。因為同樣嘅手法大家見得太多,於是好多人都學精咗唔再中計,同時我就有個疑問「既然咁多人有興趣,點解無人整返隻出黎」?

 

早排 Facebook 賣廣告賣得好勁

 

然後最近就有間公司睇準呢個商機,跟返晒成個「殺死地精」美術整咗隻堅嘅解謎遊戲《Hero Rescue》。入面包含晒搵笨廣告嘅元素,即係熔岩遇水會變石頭、同樣要救公主、一樣有毒氣等等,最好笑係主角個樣同搵笨廣告入面個角色一樣咁滯,只係染咗個頭做紅色,勁諷刺!

 

 

《Hero Rescue》同時提供 iOS 及 Android 版本,有興趣嘅玩家可以上 Google Play 及日版或美版 App Store 平台下載,免費遊玩。

滅盡殺手

重度魔物獵人中毒者,歷代遊玩時間破億分鐘!

追蹤

更多文章