【遊戲新聞】《Descenders》高超手法應對老翻 歡迎連線遊玩仲附送專用配件

香港地有返咁上下機齡嘅十個有十個都玩過老翻,不過社會進步大家都慢慢尊重知識產權,現時大部份玩家都會選擇玩正版遊戲。不過鄰近病毒輸出大國情況就好唔同,佢地仍然有好大部份人玩老翻,而打擊老翻仍然係廠商主要面對嘅課題。最近大熱單車競賽遊戲《Descenders》廠商就以極富創意嘅手法去打擊老翻,好值得其他廠商學習。

 

 

《Descenders》係一隻越野單車競賽遊戲,對應平台為 Xbox One 以及 PC Steam,而且仲好受歡迎。不過呢隻遊戲喺 PC 版盜版情況極為嚴重,差唔多佔總遊玩人數三分二。而根據偵查發現大部份嘅盜版都係來自病毒輸出大國嘅遊戲買賣平台「G2A」。而呢間野賣嘅遊戲係用超平價格就買到,利用嘅就係所謂嘅「黑卡」,即係以非法手段盜用信用卡買返黎嘅遊戲。最誇張嘅係呢間野竟然係 Google 賣廣告,令到一 Search「Descenders」時第一個結果就係出「G2A」,呢個行為成功觸怒開發商同發行商,正式決定為打擊盜版作出行動。

 

開發商 RageSquid 打擊盜版嘅手段非常有創意,並唔係果種「你玩老翻咪 Ban 你上網」做法。佢地只要偵測到玩家使用老翻,就會幫你改個名做「SKIDROW」或者「CODEX」,呢個只係前菜。然後佢會附送一個專用配件「骷髏旗」插喺架單車後面,而呢支旗係強制安裝並且無法卸除,意味住只要你車上有呢支旗就係人都知你玩老翻。呢招最絕嘅係當你有三分二人有呢支旗,而玩正版嘅你就可以自定配件,咁你就尤如「漆黑中嘅螢火蟲」一樣咁顯眼!

 

 

呢種做法並無影響老翻玩家嘅單車性能,對玩法上亦無任何影響,但係就令正版玩家喺遊戲中得到優越感,而且亦有部份老翻玩家覺得自己太樣衰而選擇買返正版,可謂一石二鳥。

《Descenders》現時已於 Xbox One 及 PC Steam 推出,對應繁體中文。之後會推出 PS4 及 Nintendo Switch 版本,敬請留意。

五木

五木 動漫電玩宅,極愛金田一系列,擅長動作及策略遊戲

追蹤

更多文章