【遊戲評測】比月下更上一層樓 《羅德斯島戰記》青出於藍類惡魔城遊戲

之前我地報導過《羅德斯島戰記》遊戲化嘅新聞,咁隻 Game 終於喺早前推出,雖然現時只係 Early Access 階段只有第一關玩,但係已經可以見到大約遊戲嘅系統及變化。我本身因為係《羅德斯島戰記》Fans,諗住只要隻 Game 唔糞我都接受,點知玩落完全係喜出望外,非常之咁好玩!

 

 

《羅德斯島戰記》全名為《Record of Lodoss War-Deedlit in Wonder Labyrinth-》,由 Team Ladybug 工作室開發,屬類惡魔城遊戲。遊戲以《羅德斯島戰記》世界觀為主軸,而官方形容本作故事係 2019 年小說《羅德斯島戰記 誓約的寶冠》嘅劇情補完。遊戲中玩家將操控精靈使者ディードリット(Deedlit),於旅程中會遇上唔同嘅角色,亦會獲得唔同精靈嘅力量。

 

商店販賣物品真係好少……

 

本作基本戰鬥系統充滿住濃厚嘅《月下夜想曲》味道,除咗有各種武器選擇之外(攻擊模式、速度、範圍各有不同),前期都係依賴斬擊 > 後 Step Cancel 硬直> 斬呢種套路。不過我地今次主要想同大家分享嘅並唔係佢嘅基本戰鬥系統,而係佢嘅「妖精相剋」系統,亦因為呢個系統令到遊戲變得極之好玩。

 

只有武器同弓箭,未見有防具等裝備

 

喺今次嘅 Early Access 版本玩家會獲得風同火二款精靈,透過依附精靈將獲得相對應能力,而武器嘅屬性亦會隨之改變。有趣嘅係,本作中並非只有主角先屬性之分,就連敵人都有分屬性。例如下圖嘅「蜥蜴人」佢本身嘅屬性係「火」,而佢攻擊嘅方式都係「火」,當玩家依附火精靈時因為大家同樣係火屬性,所以無法對玩家做成傷害,同樣地玩家亦無法對佢做成傷害,所以就必需切換到火以外嘅屬性(暫時只有風屬),先可以有效攻擊。

 

二條友都係「火」屬,劈到 2046 都唔死

轉風屬打立即得咗!

 

較進階嘅技巧就係先以火屬性承受對方火屬攻擊(傷害無效),再快速切換至風屬性擊殺敵人。不過要注意如果依附風精靈時,受到火屬性攻擊就會導至精靈等級下降。如果要提升精靈等級就必需以相反屬性擊殺敵人。即係我用風屬殺人就會跌火屬經驗,反之亦然。另外當精靈等級去到 LV 3 將附加特別能力,例如增加武器攻擊範圍等。

 

錯屬比人打中會 Level Down,雖然打4-5隻怪就升得返,不過打王果陣 Level Down 就麻煩

 

戰鬥以外亦需要用到依附精靈,因為每款精靈都會有種特殊能力,風精靈令玩家可以漂浮,而火精靈則可以引爆炸藥。而遊戲中有一種結界需要對應返同色嘅精靈先可以通過,製作團隊就利用呢個特性整咗唔少陷阱,考腦力亦考技術,令人期待之後版圖嘅陷阱會幾有心思。

 

下面有針,而果二條火結界又會移動,真係幾刺激

打王要活用精靈特性,邊打邊換好過癮

遊戲中有「弓箭」呢種遠程武器,打怪以外最重要嘅功能就係要黎解謎。要打開圖中嘅鐵門就要切斷吊住佢嘅沙包,利用弓箭撞到金屬會反彈嘅原理計算飛行路徑,唔算難但係有趣

 

總結

其實「妖精相剋」系統相信係取材自知名射擊遊戲《斑鳩》,都係玩相反屬性。不過《羅德斯島戰記》巧妙地將呢個慨念放咗入動作遊戲,再加上類惡魔城玩法,有意思嘅各種解謎,就變成呢隻作品。雖然暫時只有第一章,可遊玩地方唔多,亦未見《月下》Chok 招系統,但係已經可見遊戲水準之高,畫面表現良好,打擊感優受,仲要只係賣  HKD $66 真心抵到爛,個人估計佢遲下應該會出埋 Nintendo Switch 版,等唔到嘅就玩住 Steam 先,絕對唔會令你失望。

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章