【遊戲新聞】《動物森友會》狸克係咪奸商? 兌返現實匯率有重大發現!

《動物森友會》全城爆紅,實體版本直頭一 Game 難求,而有得玩嘅朋友相信都有一個問題。喺遊戲中對玩家提供無人島設施協助嘅公司社長「狸克」,不停地叫玩家整呢樣整果樣,然後收取鉅額貸款。亦因為咁被一眾玩家認為狸克係見錢開眼嘅放數奸商,不過外媒 Vice 日前就出咗篇有趣嘅文章,叫做幫狸克做返少少平反。

 

點解我去到無人島仲要供樓?

 

《動物森友會》一開始玩家就會去到一個無人島,因為參加咗 Nook Inc. 呢間公司嘅「無人島移居計畫」服務,而呢間公司社長就係狸克。第一日狸克就教識玩家點樣搭帳篷興建自己第一個家,不過呢個服務並唔係因為狸克好心,而係公司業務嘅一部份。當踏入第二日,狸克就會走黎同你講要收返「49,800鈴錢」起帳蓬費。然後當知你身上無錢時仲好「貼心」地提供用「哩數」還錢嘅服務,就咁睇似乎係良心商人,但呢個只係第一步。

 

落坑第一步

 

當玩家還完第一次貸款之後,狸克就會極速走黎搵你,話佢地公司有個新嘅無人島房屋計劃,可以由帳蓬 Upgrade 到房屋,然後就盛惠「98,000鈴錢」。而呢個坑又點會咁簡單,當你還完呢筆錢之後佢又會再叫你昇級,真係點睇都似奸商。

 

我就玩到咁樣,不過佢叫我還錢同時已經叫緊我升級……

 

雖然話佢似奸商,但有無諗過如果「鈴錢」換算返做現實貨幣匯率,會唔會低過瓦魯阿圖幣。外媒 Vice 就利用現實同樣擁有嘅道具去估算「鈴錢」嘅匯率。喺遊戲中每位玩家都會得到一部 Nintendo Switch 作為裝飾道具,而呢部 Switch 去商店賣到「7,495 鈴錢」,以呢個為基準,再睇返 Switch 嘅官方定價為 $299.99 美金,換算返即係每鈴錢係 $0.04 美金。

 

 

如果以呢個價格計算,起始第一間房屋收「98,000鈴錢」,亦即係大約 $3,920 美金,換返做港紙大約係 $30,400。以三萬蚊港紙買到間獨立屋真係夢幻價,正常香港地買二格階磚就得。就咁睇狸克似乎唔單只唔係奸商,直頭係佛心商人!不過呢度犯咗個錯誤,因為用緊「賣出」價黎計匯率,實際上係遊戲商店中販賣 Switch 嘅官方定價係「29,980鈴錢」。

 

 

Switch 官方定價係「29,980鈴錢」的話,照兌返匯率即係每鈴錢係 $0.01 美金,亦即係話房屋價格實際上 $980 美金就買到,港紙就大約係 $7,600,呢個價買成間屋真係得紙紮果種先掂。當然做成咁大嘅價差原因,估計係二手市場價格比官方定價低嘅關係。去到呢度,大家係咪都覺得狸克直頭係良心商人呢,不過好似忽略咗好重要嘅一樣野!

 

係咪怪錯咗你?

 

呢樣野就係遊戲中供玩家販賣道具嘅地方「Nook 商店」,實際上係由狸克兩位姪子豆狸同粒狸負責營運。以 Switch 為例,Nook 商店以「7,495 鈴錢」收購,然後再拎返去鄉公所以「29,980鈴錢」官方定價販賣,利潤接近 300%!再計埋平時賣啲花花草草果果蟲蟲魚魚等等,基本上狸克公司成個產業都係謀取緊暴利!睇返所謂嘅超平價房屋,似乎就係為咗引你入局先有咁荀嘅價格,亦都解釋咗點解間公司會咁闊佬係咁借錢比你起屋。

 

成個島嘅商業都係由狸克一家人所操控

 

當然以上嘅推論都係作為參考之用,不過就我個人黎講……狸克點睇都係奸商囉!《動物森友會》現已推出,據聞水貨炒價已經去到 $7xx 高位,建議大家買 Online 版。

 

不過整靚自己個島,釣下魚又真係幾過癮

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章