【玩物花絮】LEGO歌劇院 令街景大屋充滿文化氣色

話說 LEGO Ideas 呢排搞左個叫「MUSIC TO OUR EARS!」,以「音樂」為主題嘅創作比賽。唔知係咪全球都 Work From Home 嘅關係,見到世界各地好多高手都使盡身解數,一個月左右時間有成五百幾份「音樂」作品投稿。啱啱比我發現比賽當中有件作品,幾有新鮮感,幾高招!(「MUSIC TO OUR EARS!」作品傳送門)

大家成日都會諗,以 LEGO Minifigure 嘅比例去砌啲大型建築,一係就砌到展覽級咁巨型,一係就好似官方產品咁,左減啲右減啲,搞到”戲院”變”私人影院”咁。今次呢個嚟自德國嘅製作人 Aldar Beedo 嘅呢個 LEGO 歌劇院,可以話得上拎到個好好嘅平衡!

 

LEGO Opera House By Aldar-Beedo

 

先講呢個 LEGO 歌劇院雖然得廿幾個座位,唔係單位數字睇落都叫做似樣啲架啦!票房、衣帽間、小酒吧一應俱全,舞台部份亦冇忘記樂池呢個重要一環,觀眾席亦分設堂座、樓座,一個劇場嘅基本要素都可以話齊晒。

 

 

成個製作結構同樣精緻,除左可以獨立分成三部份。 Aldar-Beedo 亦設定左兩種擺放方式比大家選擇,你可以如街景大屋 (Modular Building) 格式咁擺設;冇咁闊嘅位置?可以三部份平排,變成長條狀擺上牆裝飾又得。

 

 

呢個作品有冇能力入到評審嘅十強之列,仲有唔洗兩個星期就有答案。如果你都希望呢個 LEGO 歌劇院可以能夠成為產品,變成你街景一部份,咁快啲去下面傳送門留個言撐呢個作品啦!

 


(4月28日更新)雖然 LEGO Opera House 最終入唔到「MUSIC TO OUR EARS!」十強,但係 Aldar-Beedo 將 LEGO Opera House 再次放到 LEGO Ideas 上,比大家繼續支持,希望能集齊一萬票去進入評審之列。如果你同我一樣,喺「MUSIC TO OUR EARS!」嘅時候已經睇中呢件作品的話,快啲去下面傳送門比個 Support Aldar-Beedo 佢嘅 LEGO Opera House 啦!

LEGO Opera House LEGO Ideas 傳送門

 

 

 

阿九

打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast //goo.gl/HRnxDW

追蹤

更多文章