相信各位都係哩個復活節入面喪煲哩隻等了又等既《FINAL FANTASY 7 REMAKE（最終幻想７重製版）》。經過３日正常發揮日打１２小時以上之後，小弟終於打爆左第一周目，又要開始白金之旅喇。

喺分享感想同講下點刷 AP 之前，先比一個 Spoiler Alert 劇透警告，以下內容含有劇透及爆機後內容，請自斟酌服用。

哩張相的確係FF7RE入面最有代表性既鏡頭之一，未打爆都根本避唔開哩張圖，係正既。

好我地開始進入主題。

如果正常情況下玩家無去特別 Farm 下 AP 或 EXP 的話，爆機大約 40 – 43 LV 左右，普通綠色魔晶石（四屬魔法，回復等等）的話應該會有一兩粒 Max 左，但需要多 AP 既大珠（復活，ＨＰＭＰ上限，屬性抗性等等），好多連第一二級都未到，無特別 Farm過的話係十分之正常，反觀廿二年前《FF7》一粒模仿如果無特別 Farm 過直頭郁都未郁過。

好彩時代進步，大家唔駛再做刻苦既農民，因為爆機之後有各種獎勵同刷 AP 既方法提供，詳見下面影片（第一次做片，多多支持，唔睇都望下丫）：

小評一下：Hard版先係遊戲既開始？

首先 Normal 難度小弟個人觀感就覺得佢做到應有既困難度，因為如果不停普攻真係會輸而且仲非常挫敗，但如果能夠捉到敵人弱點，Boss 打法，ATB 計量控制各樣的話，成個作戰係可以做到十分流暢同爽快，絕對可以由０機會打嬴變到好似好有計既感覺出黎，而其中發掘打法既過程，個種由打到流眼淚去到炒到對面流眼淚既反差係十分之有成功感。

九千血都死係咩玩法？最後嬴返個種感覺真係「Yes!」出口！

爆機之後 Hard 版就緊加有「要打得岩」既感覺，唔好話求其，Hea 少少都會由嬴變輸！

滿血都死又係咩玩法？終於過到個種感覺真係「Yeah!」出聲！

小遊戲方面個人覺得今次做到十分出色，掟鏢，打箱，健身，最令人覺得窩心既係，爆機之後係可以唔駛玩個個比較遜色既電單車小遊戲，因為佢有得比你 Skip！

哩個係一個好大既進步，哩個選擇某程度係遊戲公司願意比玩家既一個自由而好多遊戲都唔一定願意做出哩個動作，因為代表佢地都知道哩一幕係有代性但唔係有必要性，大公司黎講真係好大既讓步。

小弟覺得哩個係最有難度又有趣既小遊戲，玩完我都隻手都硬硬地，因為都輸左好多次先嬴個馬鼻。

總括黎講《Final Fantasy VII Remake》既評價就唔駛多講，亦都一次證明 Square 其實真係一間有實力同出色既電影遊戲公司，結局留低既預告更加令到玩家會再想玩返一次原版作個比較，而 且Red XIII 已經有 Attack Motion 同模組比玩家見到，即係證明好大機會原版各色會係之後既第２，３章陸陸續續出比大家玩，所以今次 Square 的確做到呃錢之餘又甘心命抵既效果比大眾，兩個字：精彩。

希望由今日到到出到最終章唔駛等到好似讀多個 Degree 咁耐喇。

當年Lightning 由FF13（Dec 09年）去到Return（Nov 13）係用左4年，真係夠你讀完成個Degree。

暫時咁多先！希望大家玩得盡興，最緊要身體健康！小弟又要返去白金之旅喇，如果再搵到有咩方法／攻略再同大家分享分享！

多謝大家收睇，同樣地有咩問題同改善希望可以指點一下，謝謝你。

VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。