【遊戲新聞】飲食界爆炸性事件 《Cooking Mama: Cookstar》原來係未經授權嘅「正版」遊戲!

貴為遊戲飲食界名星嘅 Cooking Mama,不過遲遲未有新作搞到成班 Fans 等咗勁耐,然後終於等到新作《Cooking Mama: Cookstar》推出,不過遊戲質素同口碑都真係麻麻地。點解會搞成咁,謎題喺今日終於解開!原來今次嘅《Cooking Mama: Cookstar》係一隻未經授權嘅「正版」遊戲,擁有《Cooking Mama》IP 嘅 Office Create 正式展開法律行動!

 

 

今日《Cooking Mama》嘅 IP 擁有者及創立者 Office Create 出咗一條重要公告,入面傳達一則令人驚訝嘅消息,就係早前由 Planet Entertainment LLC 發行嘅《Cooking Mama: Cookstar》係「未經授權發行產品」。喺公告入面提到,本身喺 2018 年 8 月時,Office Create 曾經有許可 Planet 開發 Nintendo Switch 版本嘅《Cooking Mama: Cookstar》,不過由於遊戲嘅質素未能達標,所以最終 Office Create 係並未接受呢個版本,並且要求 Planet 根據合同去修正遊戲,再交返比 Office Create 批核。

 

 

但係 Planet 不但無提交修改版本比 Office Create 批核,並且喺無批核情況下推出《Cooking Mama: Cookstar》至市面售賣。公告入面仲提及另一件事,就係 Planet 喺歐洲正在宣傳緊《Cooking Mama: Cookstar》嘅 PS4 版本。但係 Office Create 係從來都無授權製作任何 PS4 嘅《Cooking Mama》遊戲,同時 Office Create 亦無參與任何 PS4《Cooking Mama》遊戲開發!

 

 

現時 Office Create 因為 Planet 故意違反合同,已通知 Planet 立即終止許可。但係通知至今已超過一星期,但 Planet 仍然喺自家網站上銷售未經授權嘅《Cooking Mama: Cookstar》,完全係故意侵犯 Office Create 權利。呢種咁明目張膽嘅行為簡直近年罕見,極有鄰近播毒大國嘅風範!

現階段 Office Create 正在評估針對 Planet 嘅所有法律訴訟,去保護客戶、知識產權同《Cooking Mama》IP 。如果之前有買到《Cooking Mama: Cookstar》的話,記得好好收藏,話晒點都係一隻未經授權嘅「正版」遊戲嘛,肯定成為一代經典!

 

如果想睇完整嘅官方公告,可以睇呢度

 

五木

動漫電玩宅,極愛金田一系列,擅長動作及策略遊戲

追蹤

更多文章