【讀者投稿】大師兄返來喇!《Doom Eternal》永恒經典 重新定義

 

文長,涉及劇透,總結在最尾,想睇評分可直接跳到最後。

個標題係咪好似廣告對白呢,但呢句野的確唔係廣告咁簡單,而係《Doom Eternal》今次真係做到既野。《Doom》理論上係 FPS 遊戲既始祖(其實同一個時期有相似概念既遊戲都唔少,所以只能理論上當佢係始祖),就同現代既《Dark Souls》一樣,佢將呢一種遊戲形式、玩法、動作表現變成左一種類型。

除左 id Software 本家既其他作品之外,亦吸引左越來越多既公司加入製作,直至今日仍然係全世界最受歡迎既遊戲類別,係真正既永恒經典。

 

Doom (1993)

 

id Software 帶起過第一個電競風潮,經歷過中期《DOOM》系列同《Rage》既失敗,直至到 2016 年既《DOOM》先終於令人眼前一亮。

憑藉著爽快既射擊手感同高速既戰鬥節奏,再加上勁到癲既重金屬音樂,仲要為《DOOM》本身補上一個科幻既世界觀,令到遊戲內外既內涵都可以同其他多年既系列並肩齊足,不單只新一代既玩家可以接觸到呢個多年既品牌,最緊要係舊玩家亦到感覺返當年小學放學跑返屋企打惡魔既感動。真係不枉 FANS 跪地膜拜左四年。

但我地對《DOOM》既崇拜亦都只係得呢四年,因為你又點能夠估到一個咁強既作品基礎上,竟然仲可以繼續創新,變得更快更強更好玩!四年之後我地個神壇變左,真係打機都打到跪係到喊咁要一齊膜拜︰《DOOM Eternal》

 

 

意想不到地,所有野都變得更好

一間遊戲製作室,要整一隻好遊戲,其實唔算最難。要整第二、第三隻都係好遊戲就極難!更何況係各個方面都大幅改進既《DOOM Eternal》。

畫面方面,《Eternal 》於放棄左由《Rage 1》開始使用既全場境材質系統,轉返同其他遊戲一樣,每樣野用返獨立既材質包,令到遊戲係載入同運行上都有大幅既效率提升。

再加上 id Software 全面轉用 Vulkan Rendering,令到製作者可以更容易咁睇到建設既場景實際上係遊戲之既轉變,每次修改既細節都比以往更容易見到,催使各位設計師可以係更短既時間內做出比之前更複雜更精細既設計。係同一部 PS4 上面,四年前後兩集既遊戲我地竟然都仲睇到畫面上有飛躍式既進步,已經係一大優勢。

音樂方面,仍然由神級作曲家 Mick Gordon 操刀,今集加入左人聲元素,或者我地應該叫地獄合唱團。各方金屬風FANS 獻聲之下,令成個 OST 多左一樣地獄既冤魂為 DOOM Slayer 吶喊助威既感覺,除左更貼合故事主題之外,亦都更加有氣勢。係 OST 來講,《Doom 2016》同《Doom Eternal》都可以話係冇得輸。

 

 

講到故事方面,雖然都唔期待佢會有咩重要既發展,但實際上的確令人喜出望外。《Doom》同其他同期既 FPS 唔一樣,能夠將玩家帶到今時今日既就只有遊戲性,去到 2016 就多左個神級 OST,不過同《HALO》、《Half life》呢啲就充份故事背景設定既系列相比,確實係少左一份重量。

上集《Doom》仍然只係提供左一段唔知做乜既故事,只係多左一個唔知忠奸既 AI,一向貪心既人類,同埋被惡魔侵佔既人類殖民地。Doom Slayer 又從來唔講野,我地唔知點解佢曾經有朋友,唔知點解佢要打惡魔,更加唔知點解無論啲惡魔係用爪定用激光炮佢都唔會覺得奇怪。

今集既劇情入面,大多數既背景故事都用左文字檔來敍述,再加上少少既過場 CG,順利咁將 Doom Slayer 起源,點解咁勁,佢以前既盟友同佢地既過去同埋點解佢一定要殺哂啲惡魔講哂出來。

呢啲都係其他遊戲入面英雄起始既故事,只係為左後面既事作鋪墊,而《Doom Eternal》就係三十年後終於將呢件事成功咁做好。咁樣之後《DOOM》既故事先吹到落去,雖然唔係咩故事創舉,但有好過咩都冇。

再加上劇情細位上盡情咁抄襲呢幾十年既 FPS 遊戲橋段(唔係一件錯事來),例如啲奸角一定用無限能源來引誘有智慧生命用某種科技,最後到入侵果陣就令到你冇辦法抵抗,係你喇唔洗望喇《Mass Effect》。

個勇到唔識形容既主角唔知點解就好鍾意用武器射自己出太空,講緊你呀 Master Chief!仲有個不停代替主角講野既 AI,例如係 Cortana 咁。令到成件事複雜得來,變得有趣,都算係追返呢三十年既幾乎毫無寸進既設定既。

 

 

當然最令人難以置信既係佢竟然仲有得改進既 Gameplay 啦!

現代有好多射擊遊戲講求既係尋找掩護同有策略咁消滅敵人,同以往硬橋硬馬既《DOOM》《HALO》越走越遠。《DOOM 2016 回歸既時候真係睬你都有味,直接將遊戲現代化之後再將成個遊戲變得更快更痴線。

敵人會不停咁走動但係主角走得仲快!所有武器都唔洗上子彈,射到咁上下迎面就來一個終結技補血再殺過,成件事帶有令人透唔到氣既爽快。

 

 

《DOOM Eternal》就更加癲,因為佢係呢個節奏咁快既戰鬥過程入面竟然仲加入左策略元素!主角今次除左有二段跳同二段 DASH 之外,著名武器 Super Shotgun 仲加入左鉤爪可以將主角拉向敵人,成個 COMBO 可以連到主角唔洗落地咁滯。而應運而生既就係唔可以落地既關卡!

主角各種既移動方法再加上 Monkey Bar 第三段跳等等既技巧,點樣連動主角先可以盡量少落地或者係每次落地都可以落到安全既地方,已經係一種策略。

甚至乎上集基本上冇乜人理會既裝甲系列,今集都變得更重要。因為上集既裝甲只可以係地圖上面執,甚至仲係跳平台既獎勵來,但係基本上比人射一下就冇,反而主角既主量可以用殺怪來補,仲越殺越有,所以當然係血量比裝甲重要。

今集主角就可以用噴火器將敵人燒著而燒著左既敵人被擊中或者擊殺都會跌出裝甲補充(但相反會少左跌補血)玩家可以自行選擇自己需要邊一種資源先可以令來緊既戰鬥效益最大化,亦係一種策略。

 

 

而且比起上集既無腦狂射,今集遊戲試圖將主角打造成一個專業既獵魔達人。惡魔今次有唔同既弱點,可以破壞唔同既部位減少佢地既攻勢,而且仲會對某種武器既打擊特別弱。了解怪物既能力、弱點同行為模式成為今次 Doom Slayer 成敗既關鍵,即係今集既 Doom Slayer 順手做埋《The Witcher》。

都唔講果啲要搵到場景上既某個物年或者怪物如果唔係怪物就會無限重生,或者係必需要用某種特定打法先會死既怪等等。每一個戰鬥既改進都令玩家係超快節奏既血腥射擊之中,加入利用場景,利用武器,利用敵人既思考,最後一次又一次咁係一對一百甚至係一對幾百既大屠殺之中安然無恙。

Doom Slayer 係故事上第一個見到惡魔侵入惡夢既人,佢係因為咁而有咁堅定既意志要殺滅所有惡魔。但係佢亦都係唯一一個仲生存緊既 Sentinel。

果隊為左入地獄永久清除惡魔但係被背叛而永久滯留最後死無全屍既部隊,只有 Doom Slayer 一個仲生存緊而且仲要一直係地獄殺到連惡魔都驚既人,絕對唔會係無腦只係識開槍既軍火佬。

一個咁樣既描寫之下如果 Doom 唔利用玩家(扮演緊Doom Slayer)既智慧去解決戰鬥既話,咁個設定寫到天花龍鳳都冇意思。id Software 竟然可以係一隻遊戲入面同時補完《Doom》既設定再提升埋遊戲玩法,真係冇人夠你玩,好野!

 

 

今集可以講係冇乜缺點,我自己覺得同唯一見過有人 X,而且又成立既只係唔知點解新武器或者能力到手之後,主角唔會好似上一集咁即場攞啲怪來試刀。

相反佢會無啦啦去左一 個 VR 空間,確定你真係可以用果種能力殺到一定數量既怪先比你走……雖然好多時去搵武器既期間主角都冇怪打緊,咁都唔洗突然比人扯走啫…..

 

 

冇喇!真係冇喇!作為一隻科幻射擊遊戲佢已經做到過左一百分。甚至乎係多人遊戲模式佢驚咁多年都係玩 TDM 會好悶好快冇哂人 (個個玩FPS 都做哂食雞咁,鬼有人仲玩搶旗 TDM 咩),佢仲整左個一對二,Doom Slayer 對惡魔既不平等對戰模式。

雖然我一向唔睇好不平等對戰呢個玩法,但如果係一隻過左一百分既單機遊戲,佢免費送埋比你,又唔會話唔要既。而且最少已經好玩過《Resident Evil: Resistant》先啦……..

 

 

總結︰大師兄返來喇!

今年真係九十後回憶重流,呢頭出完《Doom Eternal》,跟住又來一隻《Half:Life Alyx》,兩隻都打出系列新高度,來緊仲有隻萬眾期待既《Halo: Infinite》添。每一隻都為自己既科幻世界觀做出唔同程度既擴充,令到人越來越投入,真係好難得。

好 Game 最驚就係可一不可再,而家《Doom》一而再,可唔可以再而三就睇 id Software 想佢條路點行喇!

 

最終評分︰95

雖然唔知其他人可以學到幾多成,但係《Doom Eternal》應該都係來緊五至十年 FPS 遊戲既教科書題材,係一推出即刻變成經典既神作。

 

 

 

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 [email protected]

 

Peter The Gamer

人生如遊戲,我就係PETER,玩既係人生,唔會有個更好既名。 有時寫下評論,多數介紹下GAME。分享、批判遊戲。

追蹤

Facebook 更多文章