【遊戲新聞】廢棄車站翻新遊戲 《Train Station Renovation》清潔重建採購一腳踢

火車鐵路迷為數眾多,多年黎都有唔少好似《電車でGO!》呢類相關遊戲推出,不過講到翻新廢棄車站遊戲就無乜。由 Live Motion Games 推出嘅《Train Station Renovation》就係針對呢個主題嘅遊戲,將被人遺忘嘅車站翻新令佢重見天日,別具意義。

 

 

《Train Station Renovation》現時可遊玩地圖有十張,都係各種唔同規模嘅火車站,而且全部都係被廢棄嘅車站,身為裝修公司員工嘅玩家就負責重建車站。既然車站已被廢棄,入面當然係破爛不堪,滿佈垃圾兼且有大量塗鴉。所以玩家第一個工作就係先清除呢啲污垢。

 

有塗鴉係指定動作啦

我都想知點解車站入面會有核廢料

咩情況都會發生,水浸都係常事

 

面對各種問題自然有對應嘅方法,垃圾就執起佢掉咗佢;塗鴉就要先整走佢再上返油漆。至於爛咗嘅長櫈等設備,就要用鐵撬將佢清除。另外仲要幫已經生鏽嘅路軌打磨,等佢可以用得返。去到後期仲要廢棄火車進行清潔同維護,滿足一眾火車鐵路迷。

 

整返靚靚

 

做完清潔同維修,下一步就係幫車站準備各種設施。使用遊戲中嘅平板電腦,去添置長櫈、垃圾桶、植物、馬桶、臉盆、售票機、時間表公告版等等。要買野就需要用錢,玩家可以透過完成任務或者分類處理垃圾黎賺錢,當賺夠錢之後升級工作台,就可以增加購買設備嘅種類。

 

唔講都唔知車站有咁多野搞

 

為咗方便休閒玩家,所以每關就算只達成一半目標都可以去下一個車站繼續玩,當然你都可以選擇玩到 100% 完成所有目標,達致更高嘅效果。

《Train Station Renovation》現時做緊搶先體驗,會喺未來一年間持續添加新物品、新任務、無線電功能等等,暫時只有 PC Steam 版本。另外喺官方亦有提供一個 Demo 版本,有興趣嘅玩家可以先試下再決定買唔買。

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章