【遊戲新聞】微軟反擊戰正式展開 「Xbox Series X」遊戲陣容公開!

新世代主機年尾就正式出街,機能以外大家最關心嘅當然就係遊戲陣容。PS5 陣型暫時仲未知有咩殺著,微軟陣型就「敵不動我先動」率先出招。琴晚嘅「Inside Xbox」直播入面,一口氣公開多隻新世代主機「Xbox Series X」嘅遊戲,仲要好多隻都好有質素,一次過帶你睇晒佢!

 

 

打頭陣嘅有 FYQD-Studio 團隊開發,採用第一身視點嘅射擊動作遊戲《Bright Memory: Infinite》。遊戲混合射擊 + 超能力元素,節奏快速打擊感亦都唔錯,又有多隻大作嘅影子。支援 DirectX 光線追蹤及 4K@60FPS 基本畫質,最高支援 120FPS。

不過講開又講,睇片果陣硬係覺得滲透住一種不協調感,到後面解說時就講明原來係黎自中國嘅開發團隊,謎底解開!

 

第二隻係老字號賽車遊戲《Dirt 5》,基本上都係玩越野賽車,更多賽道更多車更靚咁樣。同樣地受益於 Xbox Series X 強大性能,享有 4K@60FPS 高流暢高精度畫質,並且最高支援 120FPS。支援 Smart Delivery 功能,可於 Xbox One 及 Xbox Series X 二代主機遊玩。

《Dirt 5》預計於 2020 年 10 月推出,以下係實機畫面預告片。

 

跟住落黎就係 Xbox Series X 重點大作《Scorn》,屬於恐怖冒險遊戲。由於本作係受到《異型》等電影作品啟發,所以整體美術都有好濃厚嘅《普羅米修斯》味道。遊戲最早於 2014 年發表,開發時間長達五年。現時本作家用機版本將由 Xbox Series X 獨佔,支援 4K@60FPS 畫質。

至於實際上點玩仍然係未知之數(幾年前個試玩同現時版本可能已經唔同),但係齋睇條預告片已經覺得好正,期待度滿分!

 

然後值得提嘅就係《Vampire: The Masquerade Bloodlines》最新續作,玩家將扮演吸血鬼世界嘅一員,使用各種吸血鬼特殊能力同武器展開戰鬥,屬第一身動作角色扮演遊戲,不過畫面水平同前幾隻遊戲比較下顯得略低。遊戲預定於今年推出,對應平台有 PS4 / Xbox One S & X / Xbox Series X 及 PC。

 

緊接住下一隻值得留意嘅作品,係由 BANDAI NAMCO Entertainment 製作嘅《SCARLET NEXUS》。遊戲採用類似《God Eater》、《Code Vein》嘅日系風格,配以科幻背景,將二者融合,所以外國已經有人話佢係「日系 Cyberpunk」。

玩家將扮演新超能者鎮壓部隊一員「Yuito Sumeragi」,對抗入侵嘅變種敵人。玩家可使用超能力戰鬥,舉起身邊嘅重物,例如成架車廂車埋去都得。採用第三身視點,預計於 Xbox Series X / Xbox One 平台推出,發售日期未定。

 

《Second Extinction》以未來世界做舞台,但係地球已被恐龍佔領,主角一行三人特戰部隊由宇宙出發重返地球,進行殲滅之戰重奪地球。採用第一身視點,屬射擊遊戲,最多支援三人 Co-op,支援 4K@60FPS 高流暢高精度畫質,最高支援 120FPS。。遊戲中玩家將面對海量嘅恐龍,仲需要迎擊暴龍等巨型 Boss,絕對係爽快過癮之作。

《Second Extinction》將會有 Xbox Series X / Xbox One / PC 版本,發售日未定。

 

曾開發《Layers of Fear》及《Blair Witch》嘅 Bloober Team SA 帶黎全新作品《The Medium》,一隻心靈系恐怖遊戲。玩家飾演嘅女主角「瑪麗安娜」一直被「殺害腹中孩子」嘅惡夢幻影纏繞,於是陷入精神錯覺裡面,經常於現實與靈界往返。故事舞台為波蘭嘅克拉科夫市,主角為左尋找事情真相,佢黎到曾經發生大量慘劇嘅廢棄酒店。
遊戲不斷有血腥以及恐怖異想畫面穿插,首條公開影片已經成功營造超現實嘅不安沉重感。

值得一提嘅係本作邀請到製作《Slient Hill》音樂嘅作曲家山岡晃,聯同負責《Layer of Fear》音樂嘅 Arkadiusz Reikowski 為本作配樂,以二種音樂風格去突顯遊戲中二個世界嘅氛圍。支援 DirectX 光線追蹤技術,最高支援 4K@120FPS 畫質。

《The Medium》預計於 2020 年尾推出,對應平台 Xbox Series X 及 PC,並且已宣佈加入 Xbox Game Pass。

 

 

節目最後仲有震撼性加入 Xbox 陣用嘅《人中之龍 7》(詳見另稿),以及實機演示預告片《Assassin’s Creed Valhalla》(Xbox One / Xbox Series X / PS4 / PS5 / PC)。另外仲有其他遊戲:太空飛行射擊遊戲《Chorus》、EA 嘅欖球遊戲《NFL 21》、解謎冒險遊戲《Call of the Sea》、動作角色扮演遊戲《The Ascent》,均有預告片段,有興趣嘅可以喺下面睇埋。