【遊戲介紹】萌系高質動作遊戲 《小魔女諾貝塔》台灣製作誠意滿分

台灣製作嘅遊戲一直都有唔少佳作,例如《返校》、《還願》、《眾神之鬥》等等。今次介紹嘅遊戲《小魔女諾貝塔》(Little Witch Nobeta)同樣係由台灣製作,雖然仲處於製作階段,但已經得到多個獎項。上年推出試玩版之後,更持續得到大量玩家嘅好評。呢隻作品日前終於有第一條預告片出街,以及公佈搶先體驗日期。

 

 

《小魔女諾貝塔》(Little Witch Nobeta)由台灣獨立遊戲團隊 Pupuya Games 開發,故事講述小魔女為了解開自己的身世之謎而獨自前往古堡,並邂逅神祕小黑貓,過程就等大家探索啦。遊戲以 Unity 開發,採用第三身視點,屬於動作射擊遊戲。特別一提嘅係本作曾經奪得巴哈姆特 2019 ACG 創作大賽「遊戲組人氣賞」、「Unity 特別獎」、「佳作獎」3 個獎項,質素有一定保證。

 

雖然遊戲類型屬於動作射擊動作,不過唔好誤會佢係一隻 FPS 式遊戲,戰鬥系統反而更偏向動作類型。同大部份動作遊戲一樣,都係有基本嘅近戰攻擊、迴避、跳躍、使用道具等動作。不過叫得做魔女,主打嘅梗係魔法,而魔法又有二種使用方式。一種喺好似 FPS 遊戲咁,手動按鍵瞄準再發射,或者鎖定目標後盲射(命中率當然有所下降);另一種係詠唱魔法,需要使用大量魔力及需時詠唱,當然有代價同時意味住有回報,威力遠勝普通魔法之餘仲會有各種附加特殊效果。

 

想準確命中就要手動瞄準,懶嘅都可以靠鎖定發射,不過要打弱點的話都係要靠手瞄

詠唱魔法威力強大,但詠唱時會變得移動緩慢以及需消耗大量魔力

有唔少有趣設定,例如高處掉落會「仆街」,有一段時間不能移動

 

使用魔法就自然要扣 MP,一般黎講回魔手段有食藥、超慢速自然回復、怪物死亡後掉落,睇到呢度聰明嘅讀者應該會諗到「咁打王點算?」。無錯,打王時係絕對會出現「無魔」呢個情況,喺無水又無魔嘅情況下,其實仲有一個回魔手段,就係近戰攻擊命中。又因為敵人有各種屬性,例如試玩版入面嘅尾王手持大盾,而呢個盾又差唔多覆蓋晒全身,大部份攻擊打落去到係扣 0。但係使用「秘法元素」詠唱魔法具備穿透屬性,命中後仲會造成對手一段時間硬直。基本戰鬥方式詠唱魔 > 埋身近攻回魔 > 拉開距離 Loop 咁樣。

 

第一隻 Boss 大盾接近覆蓋晒全身,打落去嘅攻擊大部份都係扣 0

使用「秘法元素」詠唱魔法就可以穿透大盾,並造成硬直時間增加攻擊機會

 

當然以上戰法只係針堆第一隻 Boss 特性嘅其中一個打法,並唔係話一定要咁玩。遊戲中小魔女會學識四種魔法,每種魔法嘅特性又有分別,例如雷屬性係打遠距離、火屬係散彈咁。第一隻 Boss 戰我就試過用純近戰 + 火屬魔法打近距離戰鬥,同樣係 Work 的。另外喺準確嘅時間內,成功迴避敵人攻擊會有 Bullet Time 效果,打近戰時更加過癮刺激。(仲好有《Darksoul》味)

 

靈活運用四種屬性魔法,以及適當地喺近戰 / 遠攻間切換戰鬥方式

各種屬性魔法都有其好玩之處

 

《小魔女諾貝塔》將於 6 月 24 日喺 Steam 展開 Early Access,現時喺 Steam 商店頁面已經有試玩版免費下載,暫時只有 PC 版本。

五木

五木 動漫電玩宅,極愛金田一系列,擅長動作及策略遊戲

追蹤

更多文章