【讀者投稿】《俠隱閣》遊玩後感 | 遊戲界參考抄襲生態


大家好,又是我Snakie何師傅。
前排先討論過戰棋遊戲買少見少 (傳送門),真係無估到即刻又出一隻由河洛工作室,九六年金庸群俠傳製作公司推出既《俠隱閣》,戰棋X學院X武林X台灣製造,上面四個詞語好似無一個可以抵抗到,咁無辦法喇,去片:

《俠隱閣》無論係人設上,戰鬥上及劇情伏線都真係別具心思,而且野心之大的確係好令人期待既作品,師傅覺得若果真係有興趣試哩隻GAME的說話,可以係而家Early Access既階段入手先,早買唔止慳幾舊,仲可以早一步享受,最緊要支持下台灣製作公司!

 

《俠隱閣》特別在於主角有轉屬性既天賦,比一個打亂平衡既招數比主角係一個好吸引既玩法。

影片以外評論 – 遊戲界參考抄襲生態

玩完《俠隱閣》之後有個感覺,除左戰棋遊戲真係仲有發揮空間外,炒埋一碟會唔會係另一條血路?
以Game論Game,用架構層面去分析《俠隱閣》,不單止自由時間同《女神異聞錄5》有相似既地方,背景及方向上其實同上年既經典戰棋系列火焰之紋章既作品《火焰之紋章風花雪月》都相同,只係由戰火變做武林背景,由兵種變為屬性等等,的確係有異曲同工既感覺。

如果講相似度,《俠隱閣》其實仲似《火焰之紋章風花雪月》。

申延落去可以討論係遊戲界上既參考借鏡同抄襲搬字過紙既分別,先用參考切入,近代比較大既可以講係《PUBG》同《Apex Legend》,雙方都係以食雞為主既FPS遊戲,前者先推出並以現代槍械為藍本,後者就以超現實科幻為主,微調方面以由100人上限變成60人等等既改變,剛剛推出既時侯兩者都成日作出比較,不停以抄襲定參考黎作出討論要點,兩者結局都因為有大量既中國制外掛滲入變左一個用BAN ACCOUNT黎做新聞既遊戲。師傅覺得如果用以上例子,極其量都係大家都係用食雞為藍本,操上及打法其實係完全唔一樣,所以唔算係一個抄襲,只係一個借鏡,如果哩個都算抄襲,套用現實世界即係所有賣炸雞既餐廳都係抄肯德基?唔會架嘛。

 

除左《Apex Legend》仲有《Fortnite》,縱使師傅唔玩FPS 都不得不認同食雞玩法真係好利害‧

抄襲方面因為有病毒出產國哩一個強大既例子,實在有如天上既繁星,真係打一日都打唔曬例子。其中一個離譜既例子係《Dead by Daylight》同《第五人格》。《Dead by Daylight》由四個玩家作為Survivors對抗一個作為Killer既玩家,以恐佈生存遊戲見稱。《Dead by Daylight》其實出左好幾年,係市場上既反應一路都非常良好,師傅都比人掛死左好幾十次,每次比人係後面扑一下,每次都真心尖叫。

被掛起既Survivor 需要由其他Survivor搵機會救落黎,時間內救唔到就會判定死亡,非常刺激。

網易心諗,咁血腥又電鋸,無可能可以係咁純潔既淨土上面推出,虧佢諗得到,由殺人變做埋周咪得囉。《第五人格》係完完全全係《Dead by Daylight》既小童閹割版,無血,由變態異能殺人犯變成哥德風味,將佢由電腦搬上手機,三個字,JM9。
你話我抄佢?我成間買左你,將問題完整歸零,事實同市場又再一次證明左,邊個係有智慧,《第五人格》曾經出現係APP STORE免費榜第一位長達一星期,哩個數據並唔係用黎表達網易有幾利害,而係反映左大眾既取態,「唔理係唔係抄啦好玩咪得。」正正就係大陸用黎耳濡目染佢地既抄襲文化。套用現實世界,而家不但有間餐廳用紅白主題顏色,都係炸雞,個餐牌都一樣,只係阿伯變左後生仔,然後同我講:「唔理係唔係抄啦好食咪得。」我心諗,CLS。

幻覺黎既者,嚇我唔到既,入面個個係葛民輝黎既!

近日Ubisoft 又向Apple同Google提告阿里爸爸抄襲Rainbow Six事件,人類總是.Jpg。

Anyway,而家世道險惡,係討論係咪抄襲或參考之前,應該先考慮,你想個市場以一個咩方向發展?速食,低能,無深度,以上都可能比較主觀,師傅認為原創性,先係遊戲市場最理想既發展方向。如果你希望遊戲界係以健康方向發展,唔好覺得多你一個唔多,實情就係差你一個。同樣道理,你明既。

雖然係阿寶,但師傅都想Ubisoft嬴,唔係因為我支持佢,只係我想對家輸。

 

如果想繼續看到遊戲攻略評價,各式各樣遊戲影片,請訂閱小弟Snakie何師傅的YouTube頻道!多謝收睇,謝謝你,再見諸位!

 

 

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 [email protected]

 

 

Snakie002

Snakie002 澳洲毒撚,沉迷遊戲三十載。無實力唯有用毅力,推崇「用心打機,享受遊戲」宗旨。我得,你都得!

追蹤

Facebook 更多文章 網站